සහල් මිල පාලනය සම්බන්ධයෙන් වත්මන් රජය යම් අසමත්වීමක සිටියද එය නිවැරදි කරගැනීමට උත්සහ කරමින් සිටින බව කෘෂිකර්ම අමාත්‍ය මහින්දානන්ද අළුත්ගමගේ මහතා පවසනවා.
වී අලෙවි මණ්ඩලයේ සහල් තොග අවසන්ව ඇති බැවින් සහල් මෝල් හිමියන් විසින් කිලෝව රු.80-90 වැනී මුදලකට මිලට ගත් කීරි සම්බා තොග රු. 240ක් වැනි අධික මුදලකට විකුණමින් ලාභ උපයමින් සිටින බවයි පෙරේදා (28) දින රූපවාහිනී සාකච්ඡාවකට එක්වෙමින් ඔහු පෙන්වා දෙනු ලැබුවේ.
රටේ පවතින නීතියට අනුව වැඩි මිලට සහල් විකිණීම වෙනුවෙන් දඩය රුපියල් 2500ක් බැවින්. වී මෝල් හිමියන් එය පහසුවෙන් ගෙවන හෙයින් ඉදිරියේදී වැඩි මිලට සහල් විකිණීම වෙනුවෙන් දඩය රුපියල් ලක්ෂය දක්වා ඉහළ දැමීමට තමන් වෙළඳ ඇමතිවරයාට යෝජනා කර ඇති බවයි අළුත්ගමගේ මහතා පවසන්නේ.
එමෙන්ම තවමත් සහල් ආනයනය කිරීම සඳහා කුමන පාර්ශවයකට හෝ ආනයන බලපත්‍රයක් ලබා දී නොමැති බවත් වෙළඳ ඇමති වරයා සහල් ආනයනය කරන ලෙසට ඉල්ලීමක් සිදු කළද ඒ වෙනුවෙන් තීන්දුවක් තවමත් ගෙන නොමැති බවද පෙන්වා දෙන කෘෂිකර්ම අමාත්‍යවරයා වැඩිදුරටත් පවසන්නේ සහල් අපනයනය කිරීමට තරම් තොග මෙරට පැවතියද ඒවා සඟවා ඇති බවයි.
