කැබිනට් මණ්ඩලය වහාම විසුරුවා හැර කෙටි කාලයක් සඳහා අන්තර් පාලනයක් පිහිටුවිය යුතු බව ජාතික නිදහස් පෙරමුණේ නායක පාර්ලිමේන්තු මන්ත්රී විමල් වීරවංශ මහතා පවසනවා.
කෙටි කාලීන අන්තර් පාලනයෙන් පසුව මහා මැතිවරණයක් පැවැත්විය යුතු බවයි ආණ්ඩුවේ හවුල්කාර පක්ෂ දහය කැඳවූ විශේෂ මාධ්ය හමුව අමතමින් ඒ මහතා ඊයේ (1) දින ප්රකාශ කර සිටියේ..
ජනාධිපතිවරයා පත්කළ අමාත්ය මණ්ඩලය වහාම විසුරුවා හැර පාර්ලිමේන්තුව නියෝජනට කරන පක්ෂ සමඟ සාකච්ඡා කර එම අන්තර්කාලීන පාලනය පිහිටුවිය යුතු බවත් එම පක්ෂ සමඟ එකඟත්වයකින් එම සෑම පක්ෂයක්ම නියෝජනය වන ආකාරයට අදහස්වලට ඇහුම්කම් දී, ගරුකළ යුතු බවත් ඔහු පවසනවා.
මිනිසුන්ට සහනශීලි බලාපොරොත්තුවක් දිය හැක්කේ මෙවැනි ව්යවස්ථානුකූල පියවරකින් පමණක් බවයි ඔහු පෙන්වා දෙන්නේ.
එසේ සිදු නොකොට අනුගමනය කරන කුඩා පියවරයන්ගෙන් ජනතාව ආණ්ඩුව කෙරෙහි ඇති අවිස්වාශය සහ අප්රසාදය වෙනස් කළ නොහැකි බවත් වීරවංශ මහතා වැඩි දුරටත් පවසනවා.
ආණ්ඩුවේ පක්ෂ දහයේ නියෝජිතයන්ගේ සභාගිත්වයෙන් එම මාධ්ය හමුව බොරැල්ලේ පිහිටි ආචාර්ය ඇන්. ඇම්. පෙරේරා මධ්යස්ථානයේදී ඊයේ (1) පස්වරුවේ පැවැත්විණි.
එම මාධ්ය හමුවට විජය ධරණි ජාතික සභාව වෙනුවෙන් පාර්ලිමේන්තු මන්ත්රී අතුරලියේ රතන හිමියෝ, පිවිතුරු හෙළ උරුමයේ නායක පාර්ලිමේන්තු මන්ත්රී උදය ගම්මන්පිල, ප්රජාතන්ත්රවාදී වාමාංශික පෙරමුණේ නායක පාර්ලිමේන්තු මන්ත්රී වාසුදේව නානායක්කාර, ශ්රී ලංකාවේ කොමියුනිස්ට් පක්ෂයේ හිටපු ප්රධාන ලේකම් ඩිව් ගුණසේකර, ලංකා සමසමාජ පක්ෂයේ නායක මහාචාර්ය තිස්ස විතාරණ සහ පත්කළ මන්ත්රී ගෙවිඳු කුමාරතුංග මහත්වරු ඇතුළු පිරිසක් සහභාගි වූහ.