ඊයේ (27) දින ක්‍රියාත්මක වූ සෞඛ්‍ය වැඩ වර්ජනයට සිය සහය නොදැක්වූ බව රාජ්‍ය සේවා එක්සත් හෙද සංගමයේ සභාපති පූජ්‍ය මුරුත්තෙට්ටුවේ ආනන්ද ස්වාමීන් වහන්සේ පවසනවා.
රට මුහුණ දී තිබෙන කොවිඩ් වසංගත තත්ත්වය හමුවේ ජාතික ආපදා තත්ත්වයක් මතුව ඇති බැවින් වැඩවර්ජනයකට යාම සුදුසු නොවන බවයි උන්වහන්සේ පවසන්නේ.
දිනාගැනීමට ඉල්ලීම් ඇති නමුත් මෙය ඊට සුදුසු අවස්ථාව නොවන බවත් සෞඛ්‍ය සේවයේ එක් පිරිසක් ජීවිත පරිත්‍යාගයෙන් කටයුතු කරද්දී තවත් පිරිසක් තමන්ගේ අභිමථාර්ථයන් වෙනුවෙන් අහිංසක රෝගීන් බිල්ලට දෙන්නේ නම් එය ජනතාව අගය නොකරන බවයි උන්වහන්සේ සඳහන් කළේ.
මීට 90%ක පමණ හෙදියන් සම්බන්ධ නොවූ බවත් උන්වහන්සේ පවසනවා.
එමෙන්ම, කෙරවලපිටිය බලාගාරයේ 40%ක කොටස් ඇමරිකානු සමාගමකට විකිණීම සම්බන්ධයෙන් අදහස් දක්වමින් උන්වහන්සේ පවසා සිටියේ මේ රටේ කොටස් කෑලි කෑලි වලට කඩා විකිණීමේ කොළණිකරණයට විරුද්ධ බවත් ගෝඨාභය රාජපක්ෂ මහතා ජනාධිපති කරවීමේ ව්‍යාපාරය තුල පැවසුණේ පෙර විකිණූ දේවල් නැවත පවරා ගන්නා බව බැවින් එම ස්ථාවරයේ තමන්වහන්සේ තවමත් සිටින බවයි.
කොවිඩ් ව්‍යසනය හමුවේ පාරට බැසීමට නොහැකි වුවත් වසංගත තත්වය අඩුවූ වහාම මහාපරිමාණ විරෝධතාවයක් සංවිධානය කරන බවත් උන්වහන්සේ පවසා සිටිනවා.
තවද, සෞභාග්‍යයේ දැක්මක් බලාපොරොත්තු වුවත් බොන්නට තිබෙන සව් භාගයත් අහිමි වන තත්වයක් උදාවී ඇති බවයි උන්වහන්සේ පවසන්නේ.
