නිෂ්පාදන ආර්ථිකයක් අරමුණු කරගත් මෙවර අයවැයට ශ්රී ලංකා නිදහස් පක්ෂයේ ඡන්දය හිමිවන බව රාජ්ය අමාත්ය දයාසිරි ජයසේකර මහතා පවසනවා.
ශ්රී ලංකා පොදුජන පෙරමුණේ අමාත්යවරුන් සහ මන්ත්රීවරුන් දිගින් දිගටම ශ්රී ලංකා නිදහස් පක්ෂයට ප්රහාර එල්ල කළද සිය පක්ෂය එම ප්රහාරයන් ගනන් නොගන්නා බවයි රාජ්ය අමාත්යවරයා පවසන්නේ.
රජයත් සමඟ කිසිඳු ප්රශ්නයක් තම පක්ෂයට නොමැති බවයි ඔහු පවසන්නේ.
“මේ අයවැය හැර වෙන අයවැයක් ගේන්න පුළුවන් ජගතෙක් ඉන්නවා නම් ඇවිල්ලා කරන්න පුළුවන්. ඒත් මේ තියෙන තත්ත්වයත් එක්ක විශාල අර්බුදයක අපි ඉන්නේ. ඒ නිසා මේ වෙනතෙක් තිබුණු වාණිජ අයවැය වෙනුවට නිශ්පාදන ආර්ථිකයක් අරමුණු කරගත් ආර්ථිකයක් මේ අයවැයෙන් යෝජනා කරලා තියෙනවා. යම් සාධනීය කරුණු ගණනාවකුත් තියෙනවා. ආණ්ඩුවක ඉන්නවා නම් ඊට අවශ්ය ශක්තිය දිය යුතුයි” යැයි රාජ්ය අමාත්යවරයා පවසනවා.
රාජ්ය අමාත්යවරයා මෙසේ පැවසුවද බැසිල් රාජපක්ෂ මහතා පාර්ලිමේන්තුවට පැමිණීමට පෙර ඔහු පවසා සිටියේ වත්මන් ඇමති මණ්ඩලය විහිළු සහගත නම් යොදමින් සකස් කර අපහසුතාවට පත් කළේ බැසිල් රාජපක්ෂ මහතා සහ පී.බී. ජයසුන්දර මහතා එකතු වී බවත් බැසිල් රාජපක්ෂ මහතා පාර්ලිමේන්තුවට පැමිණියා යැයි කියා අලුතින් කිසිවක් සිදු නොවන බවත්ය.
එමෙන්ම තමා ඉල්ලා අස්වීමට සූදානම් බවත් මින් පෙර ඔහු ප්රකාශ කර සිටි අතර වයඹ මහඇමති සටනේදී වයඹ පළාතේ ජීවත්වන තමන්ට අග්රාමාත්ය මහින්ද රාජපක්ෂ මහතාගේ බාල පුත් රෝහිත රාජපක්ෂ මහතා අභියෝගයක් නොවන බවත් ඔහු පවසා සිටියා.
එමෙන්ම, එම ගැටළුකාරී කාලයේදී පාස්කු ප්රහාරය සම්බන්ධවද ඔහු ප්රභල අනාවරණයක් සිදුකර සිටියා.