රාජපක්ෂලා විසින් උගන්ඩාවේ සඟවාගෙන සිටි මුදල් මෙන්ම විදේශ රටවල සඟවාගෙන සිටි මුදල් රැගෙන එන තාක් සහ රාජපක්ෂ පවුලට අයත් බව කියන විදේශ රටවල තිබෙන දේපල විකුණා මුදල් රැගෙන එනතාක් තමන් ආණ්ඩුව සමඟ සටන් කරන බව ශ්‍රී ලංකා පොදු ජන පෙරමුණේ පාර්ලිමේන්තු මන්ත්‍රී නාමල් රාජපක්ෂ මහතා පවසනවා.
ඔහු මේ බව සඳහන් කළේ, පළාත් පාලන ආයතන නියෝජිතයින්ගේ ජයග්‍රහණය වෙනුවෙන් ජනතාව දැනුවත් කිරීමේ ජන හමුවකට සහභාගි වෙමින්.
ආණ්ඩුව බලයට පැමිණීමට පෙර ජනතාවට දුන් නොයෙක් පොරොන්දු ඉටු කරන තාක් තමන් සටන් කරන බවත්, පනත සම්මත කරගත් ආණ්ඩුව රාජපක්ෂ පවුල විසින් සොරකම් කළා යැයි කියන සියලුම ධනය ලංකාවට ගෙන ඒම රජයේ වගකීම බවත් එම ධනය ගෙන එනතුරු තමන්ගේ සටන අත් නොහරින බවද ඔහු සඳහන් කරනවා.
එහිදී ඔහු වැඩිදුරටත් කියා සිටියේ,
“රාජපක්ෂලගේ ඩුබායිවල හෝටලයක් තියෙනවා කිව්වා. ලැම්බෝගිනි 18 ක් බානවා දැක්කා, ඇමෙරිකාවේ මාලිගාවක් තිබෙනවා කිව්වා. උගන්ඩාවට තවදුරටත් ගුවන් යානයකින් සල්ලි ගෙනිච්ච කිව්වා.අපි උපරිම සහයෝගය දෙනවා මේ ධනය ලංකාවට ගේන්න.එසේ නොමැති නම් තමන් වේදිකාවේ කිව්වේ බොරු කිව්වේ කියලා ජනතාවගෙන් සමාව ගත යුතුයි. ජනතාව රැවටීමට කිසිම අයිතියක් රජයට නැහැ. ආණ්ඩුව ඉදිරි වසර 5ත් බොරු කිය කිය ඉන්න අපි ඉඩ දෙන්නේ නැහැ. ආණ්ඩුව දුන්න පොරොන්දු ඉෂ්ට කරනතුරු අපි ආණ්ඩුව ඉස්සරහට තල්ලු කරනවා.ආණ්ඩුවට අපි නිකන් ඉන්න දෙන්නේ නැහැ. එයාලා දුන්න පොරොන්දු ඉෂ්ට කරන තුරු අපි පස්සෙන් එලවනවා.”
