කෙරවලපිටිය බලාගාරය සහ එල්.එන්.ජී සැපයුම අමෙරිකානු සමාගමකට විකිණීමට ගිවිසුම් අත්සන් කිරීම පිළිබඳව ජනාධිපතිවරයා ඇමරිකාවේ සිට මෙරටට පැමිණි වහාම සාකච්ඡා කිරීමට බලාපොරොත්තු වන බව ජල සම්පාදන අමාත්‍ය වාසුදේව නානයක්කාර මහතා පවසනවා.
ආණ්ඩු පක්ෂයේ හවුල්කාර පක්ෂ කිහිපයක් ඊයේ (20) පස්වරුවේ කොළඹදී හදිසි සාකච්ඡාවක් පවත්වා තිබූ අතර ඉන් අනතුරුව මාධ්‍ය වෙත අදහස් දක්වමින් අමාත්‍යවරයා මේ බව ප්‍රකාශ කර සිටියා.
කොළ කැබැල්ලක් අත්සන් කළ පමණින් එය දේශපාලන තීන්දුවක් නොවන බවත් මෙම තීන්දුව කැබිනට් මණ්ඩලයේ පවා එතරම් සාකච්ඡා නොවූ බවත් ඔහු පවසනවා.
ශ්‍රී ලංකා කොමියුනිස්ට් පක්ෂ කාර්යාලයේ පැවැති මෙම සාකච්ඡාවට ශ්‍රී ලංකා නිදහස් පක්ෂයද ඇතුළුව ආණ්ඩුවේ හවුල්කාර පක්ෂ 11 ක් සහභාගීව තිබෙන අතර දයාසිරි ජයසේකර, වාසුදේව නානායක්කාර, විමල් වීරවංශ, මහාචාර්ය තිස්ස විතාරණ, වීරසුමන වීරසිංහ යන මැති ඇමතිවරුන් සමග පූජ්‍ය අතුරලියේ රතන හිමියන් ද සහභාගි විය.
