ලෝක ශූරතා ටෙස්ට් තරගාවලියේ දෙවන අදියර සඳහා වූ ශ්‍රී ලංකා – කොදෙව් පළමු ටෙස්ට් තරඟය ගාල්ල ජාත්‍යන්තර ක්‍රීඩාංගණයේදී අද (21) ආරම්භ වුණා.
ඒ අනුව පළමු දිනය අවසානයේ පළමුව පන්දුවට පහර දෙන ශ්‍රී ලංකා කණ්ඩායම අද දිනය සඳහා තරඟය නතර කරනවිට කඩුලු 3ක් දැවි ලකුණු 267ක් රැස්කරගෙන සිටියා.
ගාල්ල ජාත්‍යන්තර ක්‍රීඩාංගණයේ අද ආරම්භ වූ තරඟයේ ප්‍රධාන තරඟ තීරක ලෙස කටයුතු කරන ශ්‍රී ලංකා හිටපු නායක රංජන් මඩුගල්ලේ මහතා, ලොව ටෙස්ට් තරග 200 ක තරඟ තීරකවරයා ලෙස කටයුතු කරන ලද පළමු පුද්ගලයා ලෙස අද වාර්තා අතරට එක්වුණා.
ඒ අනුව ඔහුගේ එම ලෝක වාර්තාව වෙනුවෙන් ශ්‍රී ලංකා ක්‍රිකට් ආයතනය විසින් විශේෂ සමරු තිළිණයක් පිළිගැන්වීම තරඟයට පෙර සිදුකරනු ලැබුවා.
තරඟයේ කාසියේ වාසිය දිනු ශ්‍රී ලංකා නායක දිමුත් කරුණාරත්න පළමුව පන්දුවට පහර දීමට තීරණය කළා.
ශ්‍රී ලංකා නිත්‍ය ආරම්භක පිතිකරු ලහිරු තිරිමාන්න මෙම තරඟාවලියට සහභාගී නොවීම නිසා දිමුත් කරුණාරත්න සමඟ පැතුම් නිස්සංක ශ්‍රී ලංකා ඉනිම ඇරඹුවා.
පළමු කඩුල්ලට දිමුත් සහ පැතුම් ලකුණු 139ක සබඳතාවක් ගොඩ නැගුවේ ශ්‍රී ලංකා ඉනිමට සාර්ථක අඩිතාලමක් දමමින්.
එම සබඳතාව සමඟ 2018 වසරේ සිට ටෙස්ට් තරඟයක පළමු කඩුල්ල සඳහා ශතක සබඳතා 7ක් ගොඩ නැගු පළමු රට බවට ශ්‍රී ලංකාව පත්වුණා.
එමෙන්ම එය බටහිර ඉන්දීය කොදෙව් කණ්ඩායමට එරෙහිව ශ්‍රී ලංකා පිතිකරුවන් පළමු කඩුල්ල සඳහා ගොඩනගා ඇති හොඳම සම්බන්ධතාවයයි.
මේ අතර රොස්ටන් චේස් යැවූ පළමු පන්දුවාරයේදී දිමුත් කරුණාරත්න එල්ල කළ පහරක් ෆෝවඩ් ශෝට් ලෙග් කලාපයේ පන්දු රකිමින් සිටි ජෙරම් සොලොසානෝගේ හිස් ආවරණයේ වැදීම හේතුවෙන් ඔහුව වෛද්‍ය ප්‍රතිකාර ලබාදීම සඳහා රෝහල්ගත කරනු ලැබුවා.
ජෙරම් සොලොසානෝ තමන් සහභාගී වූ මංගල ටෙස්ට් තරගයේදිම මෙම අනතුරට මුහුණදීම විශේෂත්වයක්.
දිවා ආහාරයෙන් පසු ලකුණු 56ක් රැස් කරගෙන සිටි පැතුම් නිස්සංක දවාගැනීමට ෂැනොන් ග්‍රේබ්‍රියල් සමත්වුණා.
ශ්‍රී ලංකාව වෙනුවෙන් නායකත්ව ඉනිමක් ක්‍රීඩා කළ දිමුත් කරුණාරත්න සිය ටෙස්ට් ක්‍රිකට් දිවියේ 13වන ශතකය රැස් කළා.
අද දිනය සඳහා තරඟය නතර කරන විට ශ්‍රී ලංකාව කඩුලු 3ක් දැවි රැස්කරගෙන සිටි ලකුණු සංඛ්‍යාව 267ක්.
දිමුත් කරුණාරත්න නොදැවි ලකුණු 132 ක් සහ ධනංජය ද සිල්වා නොදැවි ලකුණු 56 ක් රැස් කරගෙන කඩුල්ලේ රැදී සිටියා.
හෙට තරඟයේ දෙවැනි දිනයයි.
