අවශ්‍ය ඉන්ධන ප්‍රමාණය ලබාදීමට බලශක්ති අමාත්‍ය උදය ගම්මන්පිල මහතා කැබිනට් මණ්ඩලයේදී එකඟතාවකට පැමිණි බව විදුලිබල අමාත්‍ය ගාමිණී ලොකුගේ මහතා පවසනවා.
ඒ, ඊයේ (18) රාත්‍රියේ පැවති කැබිනට් රැස්වීමෙන් අනතුරුව පිටව යන අවස්ථාවේදී මාධ්‍යවේදීන් නැඟූ ප්‍රශ්න කිහිපයකට පිළිතුරු ලබාදෙමින්.
ඩොලර් වලින් ගෙවීම් නොකරන්නේ නම් විදුලිබල මණ්ඩලයට ඉන්ධන ලබා නොදෙන බවක් බලශක්ති අමාත්‍යවරයා පැවසුවද තමන් මිත්‍රයන් වන බැවින් ගැටළුවක් ඇති නොවන බවයි ඔහු පවසන්නේ.
මාධ්‍යවේදියා –
“ඉන්ධන ප්‍රශ්නය ගැන කතා කළාද ඇමතිතුමා ?”
අමාත්‍යවරයා –
”කතා කළා, කතා කළා … ඉන්ධන ගෙන්නලා දෙන්න ලෑස්ති කරලා තියෙන්නෙ”
මාධ්‍යවේදියා –
“අපට විදුලිය නැතිවෙයිද ?”
අමාත්‍යවරයා –
”අද නැතිවෙන්නෙ නෑ”
මාධ්‍යවේදියා –
“හෙට ?”
අමාත්‍යවරයා –
”හෙට උදේට බලන්න ඕනෙ ඒක …. අපේ ඉල්ලුමට ඕනෙ කරන ඉන්ධන ටික කොහොමහරි අපි ගේනවා. හිඟයක් නැතුව තෙල් සංස්ථාවේ පිරවුම්හල් වලිනුත් දෙනවා, ඒ එක්කම අපට අවශ්‍ය ඉන්ධන ප්‍රමාණයත් අපට දෙනවා”
මාධ්‍යවේදියා –
“ඒත් තෙල් ඇමතිතුමා කියනවා දෙන්නෙ නෑ, දෙන්න විදියක් නෑ ඔබතුමාලාට කියලා ?”
අමාත්‍යවරයා –
”එහෙම ඉතිං ඒ මාධ්‍යවලට කිව්වාට … අපි මොකද අපි මිත්‍රයෝ නෙ. ඒකෙ කිසි ප්‍රශ්නයක් වෙන්නෙ නෑ”
