හෙද පරිපූරක හා අතුරු වෛද්‍ය සේවා ඇතුළු වෛද්‍ය නොවන වෘත්තීය සමිති 15ක් ඒකාබද්ධව ආරම්භ කර ඇති සංකේත වැඩවර්ජනයට තමන් වහන්සේගේ හෙද සංගමය සහභාගී නොවන බව අභයාරාමාධිපති පූජ්‍ය මුරුත්තෙට්ටුවේ ආනන්ද හිමියන් පවසනවා.
මාධ්‍ය වෙත ප්‍රකාශයක් සිදුකරමින් උන්වහන්සේ පවසන්නේ එසේ ලෙඩ නිවාඩු දැමීමේ විරෝධතා ව්‍යාපාරයක් සඳහා කිසිඳු සාධාරණ හේතුවක් නොමැති බවයි.
ජනාධිපතිවරයා විසින් ඉල්ලීම් 7ක්ම ලබාදීමට පොරොන්දු වූ බවත් ඊට අදාල චක්‍රලේඛ මේ වන විටත් නිකුත් වී ඇති බවත් ජනවාරි මස වන විට ඒවා ඉටු වන බවත් උන්වහන්සේ පවසනවා.
එසේ තිබියදී සිදුකෙරෙන මෙම විරෝධතාවයට මූලික වන ඉල්ලීම කුමක්ද යන්න තමන්වහන්සේට නොවැටහෙන බවයි උන්වහන්සේ පවසන්නේ.
කෙසේ වෙතත්, සෞඛ්‍ය සේවයේ උසස් වීම් විෂමතා ගැටලු, හෙද උපාධිධාරීන්ගේ වැටුප් කප්පාදු ඇතුළු ගැටලු කිහිපයක් මුල් කරගනිමින් මෙම විරෝධතාවය සිදුවන බවත් අද (24) පෙරවරු 7 සිට පැය 48ක කාලයක් එම සංකේත වැඩවර්ජනය ක්‍රියාත්මක වන බවත් සෞඛ්‍ය වෘත්තීයවේදීන්ගේ සම්මේලනයේ කැදවුම්කරු රවී කුමුදේශ් මහතා සදහන් කරනවා.
