කොවිඩ් 19 වෛරසය ආසාදනය වී ඇති බව පවසමින් වැලිකඩ රිමාන්ඩ් බන්ධනාගාරයෙන් මාරුකර යවා ඇති පාස්කු බෝම්බ ප්‍රහාරයේ ප්‍රධාන සැකකකරු සහරාන් හෂීම්ගේ බිරිඳ මේ වන විට සිටින්නේ කොහේදැයි දැනුම් දී ඇගේ ආරක්ෂාව සහතික කිරීමට වහාම පියවර ගන්නා ලෙස ශ්‍රී ලංකා මානව හිමිකම් කොමිසම බන්ධනාගාර කොමිසම් ජනරාල්ට නිර්දේශ කර යවා ඇත.
ශ්‍රී ලංකා මානව හිමිකම් කොමිසම බන්ධනාගාර කොමසාරිස් තුෂාර උපුල්දෙනිය මහතාට අදාල ලිපිය යවා ඇත්තේ නොවැම්බර් 10 වන දිනය.
පාස්කු බෝම්බ ප්‍රහාරය පිලිබඳ විභාග කරන ජනාධිපති කොමිසම හමුවේ සාදියා මහත්මිය සාක්ෂි දීමෙන් අනතුරුව ඇගේ ජීවිතය අවදානමේ පවතින බවට පැමිණිලි ගණනාවක් පසුගිය පැය 48 තුල කොමිසමට ලැබී ඇති බව ලිපියේ සදහන් වන අතර සහරාන්ගේ නායකත්වයෙන් යුත් ජාතික තව්හීඩ් ජමාත් සංවිධානයට මුදල් ලැබුණු ආකාරය සම්බන්ධ මෙතෙක් හෙළි නොවූ තොරතුරු සාදියා ෆාතිමා පාස්කු බෝම්බ කොමිසම හමුවේ අනාවරණය කළ බව ජනමාධ්‍ය ආයතන කිහිපයක්ම වාර්තා කර තිබුණු බවත් එහි සදහන් වි ඇත.
ෆාතිමා සාදියා මහත්මිය මේ වන විට ඉන්නා තැනක් පිලිබඳ තොරතුරු නැතිවීම කෙරෙහිද මානව හිමිකම් කොමිසමේ අවධානය යොමුවී ඇති අතර ඇය ඉන්නේ කොහේ දැයි කොමිසම වෙත දන්වන්න යැයිද අදාල ලිපියේ සදහන් කර ඇත.
