ඇමරිකා එක්සත් ජනපදය තායිවානයට ඇමෙරිකානු ඩොලර් බිලියන 1.1ක යුධ උපකරණ ලබා දීම ප්‍රකාශයට පත්කිරීමෙන් පසු චීනය ඊට දැඩි ප්‍රතිචාරයක් දක්වා තිබෙනවා.
ආරක්ෂක සහයෝගිතා ඒජන්සියට අනුව, තායිවානයට අලෙවි කරන යුද උපකරණ අතර Harpoon සහ Sidewinder මිසයිල ද ඇතුළත් වේ.
එක්සත් ජනපද රාජ්‍ය දෙපාර්තමේන්තුව විසින් තායිවානයේ ආරක්ෂක හැකියාවන් නවීකරණය කිරීම සහ එක්සත් ජනපද ආරක්ෂක අවශ්‍යතා සඳහා සේවය කිරීම සඳහා තායිවානය වෙත Harpoon Block II මිසයිල සහ අදාළ උපකරණ විකිණීම සඳහා ඇමරිකානු ඩොලර් මිලියන 355 ක් අනුමත කරන ලදී.
එහිදී ඇමරිකානු ඩොලර් මිලියන 85.6 ක ඇස්තමේන්තුගත පිරිවැයක් යටතේ Block II Sidewinder මිසයිල සහ ඒ ආශ්‍රිත උපකරණ විකිණීමට ද රාජ්‍ය දෙපාර්තමේන්තුව අනුමැතිය ලබා දී ඇත.
නිරීක්ෂණ රේඩාර් වැඩසටහන් ආධාරක සහ උපකරණ සඳහා ඩොලර් මිලියන 665.4 විකිණීමට ද අනුමත වී තිබේ.
මේ අතර නවතම ආයුධ අලෙවිය සම්බන්ධයෙන් චීනය ප්‍රකාශ කළේ ඔවුන් සැමවිටම තායිවානය සමඟ එක්සත් ජනපදයේ මිලිටරි සම්බන්ධතාවලට සහ තායිවානයට ආයුධ විකිණීමට එරෙහිව කටයුතු කරන බවයි.
තායිවානය චීනයේ පළාතක් බවත් චීනයේ තායිවාන කලාපයට එක්සත් ජනපද ආයුධ විකිණීම, චීන-එක්සත් ජනපද ඒකාබද්ධ ප්‍රකාශ සහ දේශපාලන කැපවීම උල්ලංඝනය කිරීමක් බව චීන විදේශ අමාත්‍යාංශයේ ප්‍රකාශක මාඕ නින්ග් මාධ්‍ය හමුවකදී පැවසීය.
