මින්නේරිය ජාතික වනෝද්යානයට ආසන්න හබරණ ප්රදේශයේදී වනජීවී සංරක්ෂණ දෙපාර්තමේන්තු නිලධාරීන් සහ යුද හමුදාවේ මේජර් ජෙනරාල්වරයෙකු අතර සිදු වූ සිදුවීම ඉහළ පෙළේ නිලධාරීන් හරහා සමථයකට පත්කිරීමේ උත්සාහයක් ක්රියාත්මකවනවා.
එසේ ම මෙහිදී අදාළ හමුදා නිලධාරියා ප්රධාන මාර්ගයෙන් වනෝද්යානය දෙසට ඇතුළු නොවූ බව තහවුරු කිරීමටත්, සමාජ මාධ්ය ඔස්සේ සංසරණය වූ වීඩියෝ පටයට අදාළ සිදුවීම සම්බන්ධයෙන් පමණක් විමර්ශනයක් සිදු කොට ඊට අදාළ පරීක්ෂණ විනය පියවරකින් පමණක් අවසන් කිරීමටත් අමාත්යංශ මට්ටමින් සාකච්ඡා සිදුවෙමින් පවතින බව විශ්වාස කටයුතු ආරංචි මාර්ග සඳහන් කරයි.
මේ සම්බන්ධයෙන් වනජීවී විෂය භාර රාජ්ය ඇමැති විමලවීර දිසානායක පැවසුවේ තමන්ට සිදු කළ හැකි සියල්ල මේ සම්බන්ධයෙන් සිදු කර ඇති බවයි.
තමන් මේ සම්බන්ධයෙන් ආරක්ෂක අමාත්යංශ ලේකම් කමල් ගුණරත්නට දැනුම් දුන් බවත්, වනජීවී සංරක්ෂණ දෙපාර්තමේන්තුවේ අධ්යක්ෂ ජනරාල්වරයාට ද මීට අදාළ ව නීතිමය පියවර ගන්නා ලෙස උපදෙස් දුන් බවත් ඇමතිවරයා සදහන් කරනවා.
කෙසේ වෙතත් මේ සිද්ධියට අදාළ විමර්ශන සම්බන්ධයෙන් ගැටළු පැවතීම නිසා වනජීවී වෘත්තීය සමිති වැඩවර්ජනයකට සූදානම් වනවා.
වනජීවී වෘත්තීය සමිති එකමුතුවේ කැඳවුම්කරු ඉමේෂ් ගුණතිලක සඳහන් කළේ අදාළ වර්ජන සූදානම සහ සිදුවීමට අදාළ පරීක්ෂණ පිළිබඳ ගැටළුව සම්බන්ධයෙන් විෂය භාර ඇමැතිවරයා දැනුවත් කර ඇති බවයි.