කොළඹ වරාය නගරයට අදාල පනත හදිසියේ සම්මත කිරීමට විරෝධය පළ කරමින් උද්ඝෝෂණයේ නිරත වු සමගි ජන බලවේගයේ මන්ත්‍රීවරුන්ට එරෙහිව නීතිමය ක්‍රියාමාර්ග ගන්නා ලෙස කඩුවෙල මහෙස්ත්රාත් අධිකරණය තලංගම පොලීසියට උපදෙස් ලබාදී තිබේ.
තලංගම පොලීසිය විසින් පවසා ඇත්තේ නිරෝධායන නීති අනුව එම උද්ඝෝෂණය පැවැත්වීමට නොහැකි බවයි.
කෙසේවෙතත් සමගි ජනබලවේගය පක්ෂය පාර්ලිමේන්තුවට පිවිසෙන මාර්ගයේ උද්ඝෝෂණය පවත්වා ඇති අතර පොලීසිය අධිකරණයට කරුණු වාර්තා කිරීමේදී පවසා තිබුණේ පුද්ගල දුරස්ථභාවය හෝ සෞඛ්‍ය නිර්දේශ නොතකමින් ජනතාවට අවහිර වන සේ එම මහජන නියෝජිතයින් කටයුතු කර ඇති බවයි.
ඒ අනුව සිද්ධිය සම්බන්ධයෙන් රූපවාහිනි නාලිකා සතු සංස්කරණය නොකළ දර්ශන ලබාගෙන ඒ පිළිබඳ වැඩිදුර විමර්ශන සිදුකරන ලෙස කඩුවෙල මහෙස්ත්රාත් අධිකරණය පොලීසියට දැනුම් දී ඇත.
