රාජපක්ෂ ආණ්ඩුවේ සිට දොට්ට දැමීමෙන් අනතුරුව ව්‍යාජ ආණ්ඩු විරෝධයක් මවාපෑ විමල් වීරවංශගේ නිවසටද විරෝධතාකරුවන් ගිනි තබා තිබෙනවා.
එම ගින්නෙන් නිවසට අලාභ හානි රැසක් සිදුව ඇති බවයි වාර්තා වන්නේ.
මීට අමතරව මුදල් අමාත්‍ය අලි සබ්රිගේ නිවසද ගිනි තබා විනාශ කර තිබෙනවා.
මේ අතර අද පැවති ප්‍රවෘත්ති සාකච්ඡාවකදී විමල් වීරවංශ පැවසුවේ ස්ථිර නොවූ සේවකයන් ස්ථිර නොකරන බවට තර්ජනය කර අද අරලියගහ මන්දිරය වෙත කැඳවාගෙන විත් ඇති බවයි.
“මේ සිද්ධි ඔක්කොම වුණාට පස්සේ ඉල්ලා අස්වෙන එක නෙමෙයි. මේවා මෙතෙන්නට එන්නට කලින් ඉල්ලා අස්වෙන්න නොදුන්නේ කවුද ? අද ඔය අරලියගහ මන්දිරයට කැඳවපු මිනිස්සුන්ට උද්වේගකර ආවේගශීලි කතා පවත්වලා ප්‍රචන්ඩත්වයට පෙළඹෙව්වේ කවුද ? ජොන්ස්ටන් අමාත්‍යවරයා ඇතුළු කල්ලියක් තමයි බැසිල් රාජපක්ෂගේ උපදෙස් හා මඟපෙන්නවීම මත හොරාකාපු සල්ලි වියදම්කරගෙන තමයි. ඒ තමන්ගේ පාක්ෂිකයා උසිගන්වලා, කුළු ගන්නවලා අර අරලියගහ මන්දිරය ඉදිරිපිට තිබෙන ඒ විරෝධතාකරුවන් එළවලා දාන්නත්, පහරදෙන්නත්, ඒ වගේම ගාලුමුවදොරට ගිහිල්ලා පහර දෙන්නත්… මොරටුව නගරාධිපති සමන්ලාල් බස් 4කින් සෙනඟ ගෙනිල්ලා තියෙනවා. ඒ බස් 4ම ඉඳලා තියෙන්නේ මොරටුව නගර සභාවේ දවසේ දීමනාවට වැඩකරන ස්ථිර නොවූ සේවකයින්. ඒ මිනිස්සු යන්න කැමතිවෙලාත් නැහැ. උඔලාව මම ස්ථිරකන්නේ නැහැ ආවේ නැත්නම් කියලා තමයි බස්වල පටවාගෙන ගිහින් තියෙන්නේ. දැන් ජොන්ස්ටන් ඇවිල්ලා ඒ අය බේරගන්නවාද ? දැන් මහින්ද රාජපක්ෂ ඇවිල්ලා ඒ මිනිස්සු බේරගන්නවාද ? තමන්ගේ පාක්ෂිකයෝ ඇවිත් ගුටිකන තත්ත්වයට එනකන් මොකද හිටියේ ඉල්ලා අස්වීමේ ලියුම දෙන්න. ඒකද නායකයා කියන්නේ. අයින්වෙන්න ඕන තැනදී අයිවෙන්න පුළුවන් වෙන්න ඕනේ. ඒ හැකියාව නැතිනම් ඔවුන් නායතයෝ නෙමෙයි. මළ පෙරේතයෝ. අපි මේ අවස්ථාවේදී දණ නමස්කාර කරලා. වැඳලා ඉල්ලන්නේ. සෑම පාර්ශවයකින්ම සාමකාමී වෙන්න. නීතිය ක්‍රියාත්මක වෙන්න ඕනේ, එතනට ඒ අයව ක්‍රියාත්මක කරපු ජොන්ස්ටන් ප්‍රානාන්දුලාව දක්වා අත්අඩංගුවට අරගන්න ඕනේ.”
