කොළඹ ප්රසිද්ධ පෞද්ගලික රෝහලක වෛද්යවරයෙකු නීත්යානුකූල නොවන ආකාරයෙන් සිදුකළ ගබ්සාවක දී 30 හැවිරිදි කාන්තාවක් ජීවිතක්ෂයට පත් වූ බව පැවසෙන සිද්ධියකට අදාළ මරණ පරීක්ෂණය ලබන ජනවාරි මාස 7 දින පැවැත්වීමට කොළඹ අතිරේක මහේස්ත්රාත් තරංගා මහවත්ත මහත්මිය ඊයේ (17) දින නියම කළා.
පිළියන්දල ප්රදේශයේ පදිංචි තිස් හැවිරිදි කාන්තාවක් එසේ ජීවිතක්ෂයට පත්ව ඇති අතර ඇගේ සැමියා දෙමටගොඩ පොලිසිය වෙත කරන ලද පැමිණිල්ලක් අධිකරණය හමුවේ කැඳවූ අවස්ථාවේ දී මහේස්ත්රාත්වරිය එසේ නියෝග කළ බවයි වාර්තා වන්නේ.
අගතියට පත් පාර්ශ්වය වෙනුවෙන් පෙනී සිටි නීතිඥයා ෆසීර් මොහොමඩ් මහතා සිද්ධිය සම්බන්ධයෙන් කරුණු දක්වමින් අධිකරණය හමුවේ කියා සිටියේ 2022 වසරේ ඔවුන් විවාහ වී ඇති බවත් එම කාන්තාව 2024 වර්ෂයේ දී ගැබ් ගෙන ඇති බවත් ය.
එසේ ගැබ් ගැනීමෙන් අනතුරුව එම කළලයට මාස 5 ක් ගතව තිබිය දී එම කළලය තුළ ඇති වූ රෝගී තත්ත්වයක් හේතුවෙන් ඇය වෛද්යවරු කීපදෙනෙකු වෙත ගොස් පරීක්ෂා කර බලා තිබෙන බවත් කුස තුළ සිටි දරුවාට කිසියම් සංකූලතාවයක් ඇති බවට එම වෛද්යවරුන් ද සිය වාර්තාව මගින් පෙන්වා දී ඇති බව ද නීතිඥවරයා පැවසුවා.
ඉන් අනතුරුව එම අඹුසැමි යුවල කොළඹ ප්රදේශයේ පිහිටි පෞද්ගලික රෝහලක් වෙත ගොස් එහි සිටි මහාචාර්යවරයකු වන ප්රසව හා නාරිවේද වෛද්යවරයෙකු හමු වී ඇති බවත් දරු ගැබ තුළ සිටින දරුවාගේ වකුගඩුවල පවතින ගැටලුවක් හේතුවෙන් බිරියගේ ජීවිතයට මෙන්ම දරුවාගේ ජීවිතයට ද අවදානමක් පවතින බැවින් දරුවා ඉවත් කිරීමට කටයුතු කළ යුතු බවත් ඒ සඳහා රුපියල් 250,000 මුදලක් අවශ්ය බව වෛද්යවරයා එම අඹුසැමි යුවළට දන්වා ඇති බව ද නීතිඥවරයා අධිකරණයට දැනුම්දුන්නා.
එම අඹුසැමි යුවල ඊට එකඟතාවය පළ කිරීමෙන් අනතුරුව අදාළ වෛද්යවරයා ඔවුන්ට දෙමටගොඩ – මහවිල ගාර්ඩ්න් නමැති ස්ථානයකට පැමිණෙන ලෙස දැනුම්දීමෙන් අනතුරුව ඔවුන් ඉකුත් නොවැම්බර් මස 20 දින එම ස්ථානය වෙත ගොස් ඇති බව ද නීතිඥවරයා අධිකරණයට දැක්වූ කරුණුවලින් හෙළි ව තිබෙනවා.
සිය සැමියා ද සමඟ එම ස්ථානයට ගිය බිරිඳව එම වෛද්යවරයා එහි රඳවා තබාගෙන අඩුවක් යොදා දරුගැබ ඉවත් කර ඇති බවට එම කාන්තාව පැමිණිලිකාර සැමියාට දන්නවා ඇති බවත් ඒ එම සිද්ධියෙන් අනතුරුව ඇයට අධික රුධිර වහනයක් සිදුව ඇති බව ද නීතිඥවරයා අධිකරණයට ප්රකාශ කළා.
ගබ්සාවෙන් අනතුරුව අධික රුධිර වහනය හේතුවෙන් ඇය දැඩි අසාධ්ය තත්ත්වයකට පත්ව ඇති බවත් එසේ අසාධ්ය තත්ත්වයට පත් ඇයව අදාළ වෛද්යවරයා විසින් ඔහු සේවය කරන රෝහල වෙතට ඉකුත් 22 දින රැගෙන යාමෙන් අනතුරුව පැය එකහමාරකට ආසන්න කාලයක දී ඇය ජීවිතක්ෂයට පත්ව ඇති බව ද සිද්ධිය සම්බන්ධයෙන් කරුණු දක්වමින් නීතිඥවරයා අධිකරණය හමුවේ පැවසුවා.
එම ගබ්සාව සිදුකළ ස්ථානයේ කිසිදු ශල්යකර්මයකට සුදුසු ස්ථානයක් නොවන බවට පොලිස් විමර්ශනවල දී අනාවරණය වී ඇති බව ද නීතිඥවරයා අධිකරණයට දැක්වූ කරුණුවලින් හෙළි වුණා.
සිය බිරිඳ දැඩි අසාධ්ය තත්ත්වයට පත්ව සිටින මොහොතේ ඇයව කොළඹ ජාතික රෝහල වෙත රැගෙන යන ලෙසට පැමිණිලිකාර සැමියා එම වෛද්යවරයාට කීප අවස්ථාවකදීම දැනුම්දී ඇතත් ඔහු එම ඉල්ලීම නොසළකා හැර ඇති වෛද්යවරයා ඔහු සේවය කරන පෞද්ගලික රෝහල වෙත ඇයව එසේ රැගෙන ගොස් ඇති බවට පැමිණිලිකරු සිය පැමිණිල්ල මගින් පොලිසිය වෙත දැනුම් දී ඇති බව ද සිද්ධිය සම්බන්ධයෙන් වැඩිදුරටත් කරුණු දක්වමින් නීතිඥවරයා අධිකරණයට දැනුම්දුන්නා.
මෙම සිද්ධියේ දී අදාළ වෛද්යවරයා වගකීම් විරහිතව කටයුතු කර ඇති බවට සිදුවීම් දෙස බැලීමේ දී පෙනී යන බව ද නීතිඥවරයා වැඩිදුරටත් කරුණු දක්වමින් අධිකරණය හමුවේ ප්රකාශ කළා.
