කොවිඩ්-19 වෛරසයට එරෙහිව චීනය නිපදවූ දෙවන එන්නත වන සිනොවැක් (Sinovac) සංවර්ධනය වෙමින් පවතින රටවල් අතර බෙදාහැරීමට මග සලසමින් හදිසි භාවිතා කිරීම සඳහා ලෝක සෞඛ්‍ය සංවිධානය විසින් අනුමැතිය ලබා දී තිබේ.
ඒ අනුව සිනොවැක් එන්නත ආරක්ෂාව, කාර්යක්ෂමතාව සහ නිෂ්පාදනය සඳහා වන ජාත්‍යන්තර ප්‍රමිතීන් සපුරා ඇති බව ලෝක සෞඛ්‍ය සංවිධානය නිල වශයෙන් පිළිගනු ලැබීය.
ලෝක සෞඛ්‍ය සංවිධානයේ අධ්‍යක්ෂ ජනරාල් ටෙඩ්‍රොස් අද්නාම් ගෙබ්‍රෙයිසස් එන්නත නිල වශයෙන් පිළිගනිමින් ගබඩා කිරීමේ පහසුව සලකා බැලීමේ දී අඩු ආදායම්ලාභී රටවලට වඩාත් සුදුසු බව සඳහන් කළේය.
ජීවිතාරක්ෂාව වෙනුවෙන් එන්නත අවශ්‍ය පුද්ගලයින් වෙත ඉතා ඉක්මණින් ලබා දීමට කටයුතු කළ යුතු බව ටෙඩ්‍රොස් අද්නාම් වැඩිදුරටත් පවසා ඇත.
ඒ අනුව ස්වාධීන විශේෂඥයින්ගෙන් සමන්විත මණ්ඩලයක් නිවේදනයක් නිකුත් කරමින් කියා සිටියේ වයස අවුරුදු 18 ට වැඩි පුද්ගලයින් සඳහා සිනොවැක් එන්නත නිර්දේශ කළ බවයි.
එහි දෙවන මාත්‍රාව සති හතරකට පසුව ලබා ගැනීමට ද ඔවුන් විසින් නිර්දේශ ලබා දී තිබේ.
මැයි 7 වන දින ලෝක සෞඛ්‍ය සංවිධානය චීනයේ නිපදවනු ලැබූ පළමු එන්නත වන සයිනොෆාම් සඳහා හදිසි අනුමැතිය ලබා දීම සිදු කරන ලදී.
