ජනාධිපතිවරයාට, ඔහුගේ බිරිදට හා ආරක්ෂකයන් දෙදෙනෙකුට කටුනායක සිට මාලදිවයින බලා පිටත්ව යාමට පවතින රජයේ ඉල්ලීමට අනුව ගුවන් හමුදාවේ යානයක් අද (13) අලුයම ලබා දුන් බව ගුවන් හමුදාව නිවේදනය කරනවා.
ආණ්ඩුක්‍රම ව්‍යවස්ථාවේ විධායක ජනාධිපතිවරයෙකුට හිමි බලතල ප්‍රකාරව පවතින රජයේ ඉල්ලීමට අනුව, ආරක්ෂක අමාත්‍යාංශයේ පූර්ණ අනුමැතියට යටත්ව ගුවන්තොටුපොළ ආගමන විගමන, රේගු හා අනෙකුත් සියලුම නීතිවලට යටත්ව ජනාධිපතිවරයා, බිරිඳ සහ ආරක්ෂකයින් දෙදෙනකුට මාලදිවයින බලා පිටත්ව යාමට ගුවන් හමුදා යානයක් ලබා දුන් බවයි ගුවන් හමුදා මූලස්ථානය නිවේදනයක් නිකුත් කරමින් පවසන්නේ.
ඒ අනුව ගුවන් හමුදාවේ සහයෙන් ගෝඨාභය රාජපක්ෂ ඇතුළු පිරිස මාලදිවයින බලා ආරක්ෂිතව පියාසර කර තිබෙනවා.
පසුගිය 09 වනදා ඇතිවූ සිදුවීමත් සමඟ අතුරුදන්ව සිටි ගෝඨාභය රාජපක්ෂ නාවුක හමුදාවට අයත් නෞකාවකින් ත්‍රිකුණාමලයට ආසන්න මුහුදේ දින කිහිපයක් ගතකර, ත්‍රිකුණාමලය නාවුක හමුදා කදවුරට පැමිණියා.
එම ස්ථානයෙන් කොළඹට පැමිණ අවස්ථා කිහිපයකදීම විදෙස් ගතවීමට උත්සහ කළද එය ව්‍යාර්ථ වී තිබුණා.
