කෝටි 13කට අධික යූ ටියුබ් නැරඹුම් වාර ගණනාවක් සහිත මැණිකේ මගේ හිතේ ගීතය අද (30) දින නවදිල්ලි නුවර ආසන්නයේ පිහිටි, ධනවතුන් වෙසෙන ප්‍රදේශයක් වන ගුරුග්‍රෑම්හි දි ගැයීමට යොහානි දිලෝකා ද සිල්වා සූදානමෙන් සිටින බව India tv news වාර්තා කරනවා.
එම සංගීත සංදර්ශනය පවත්වන ගුරුග්‍රෑම් නගරයට සංගීත රසිකයන් අති විශාල පිරිසක්ද බොලිවුඩ් තරු , ඉන්දීය සිනමාවේ දැවැන්ත සංගීත ශිල්පීන් ඇතුළු විද්වතුන් විශාල පිරිසක් ද පැමිණෙනු ඇති බවයි මෙහි සංවිධායකයන් විශ්වාස කරන්නේ.
මෙම සංගීත ප්‍රසංගය අද දින සවස 6 ට පැවැත්වීමට නියමිත අතර මේ සඳහා අවශ්‍යවන ප්‍රචාරක කටයුතු රූපවාහිනී, පුවත්පත් දැන්වීම්, ටිකට්පත් අලෙවිය වැනි කටයුතු භාරදී ඇත්තේ එම ක්ෂේතයේ දැවැන්තයෙකු සහ ඉන්දියාවේ ප්‍රමුඛ පෙළේ සමාගමක් වන ‘බුක් මයි ෂෝ’ නමැති සමාගමටයි.
එමෙන්ම, ඔක්තෝබර් 3දා සවස 6 ට හයිද්‍රාබාද්හිදී ඇයගේ මීළඟ සංගීත සංදර්ශනය පැවැත්වීමට කටයුතු සූදානම් කර තිබෙනවා.
මෙම සංගීත ප්‍රසංග මාලාව හරහා ඇයට විශාල ජාත්‍යන්තර අවධානයක් හිමිවනු ඇති බවටයි විශ්වාස කෙරෙන්නේ.
