විවිධ කාර්මික දෝෂවලට ලක් ව පියාසර කටයුතුවලින් ඉවත් කර තිබූ ගුවන් යානා 08ක් සඳහා ශ්රී ලන්කන් ගුවන් සේවය වසර දෙකක් තිස්සේ රුපියල් මිලියන 5,646.76ක බදු කුලී මුදලක් ගෙවා ඇති බව ජාතික විගණන කාර්යාලය නිකුත් කළ වාර්තාවක දැක්වෙනවා.
එම වාර්තාවේ දැක්වෙන්නේ ශ්රී ලංකන් ගුවන් මෙහෙයුම් සඳහා ගුවන් යානා 27ක් අවශ්ය ව තිබුණ ද ඔවුන් සතු ව ඇත්තේ, යානා 24ක් පමණක් බවයි.
2022-2023 වර්ෂයන් සඳහා අදාළ මුල්ය ප්රකාශයන් නිකුත් කරමින් ජාතික විගණන කාර්යාලය මේ බව පවසනවා.
එම ගුවන්යානා 24න් ද ගුවන් යානා 08ක් පසුගිය වසරේ අප්රේල් මස 20 වනදා දක්වා කාර්මික දෝෂ හේතුවෙන් භාවිතයෙන් ඉවත් කර තිබූ බව සිය විගණනය මඟින් ජාතික විගණන කාර්යාලය පෙන්වා දි තිබෙනවා.
ඒ අනුව, එම ගුවන්යානා 08 සඳහා 2021 වසරේ සිට 2023 අප්රේල් මස 20 වනදා දක්වා වසර දෙකක ආසන්න කාලය තුළ මෙලෙස බදු කුලී ගෙවා ඇති බව අදාල වාර්තාවල සඳහන්.
එම අගය ආසන්න වශයෙන් රුපියල් බිලියන 05කට ආසන්න වෙනවා.
පසුගිය කාලයේ ශ්රී ලන්කන් ගුවන්සේවය විසින් ලබාගනු ලැබූ නියෝ (NEO) වර්ගයේ ගුවන්යානා මෙලෙස ගුවන් මෙහෙයුම්වලින් ඉවත්කිරීමට සිදු වුණේ ගෝලීය වශයෙන් එම යානාවල එන්ජින්හි ඇති වූ ගැටලුකාරී තත්ත්වයක් හේතුවෙන්.
කෙසේවෙතත්, එම එන්ජින් අලුත්වැඩියා කරන තුරු අමතර එන්ජින් ලබාදීමට නිෂ්පාදක ගුවන් සමාගම සමඟ එකඟත්වයට පැමිණ ඇති බව ද ශ්රී ලන්කන් ගුවන් සමාගම එහි දී පෙන්වා දී තිබෙනවා.
මේ වන විට ශ්රී ලන්කන් ගුවන්සේවය සතුව නියෝ කාණ්ඩයට අයත් ගුවන්යානා 6ක් පවතින අතර, එහි A320 නියෝ වර්ගයේ ගුවන් යානා 2ක් සහ A321 නියෝ වර්ගයේ ගුවන් යානා 4ක් පවතිනවා.
මේ වන විට එම යානා අතුරින් A320NEO කාණ්ඩය අයත් (4R-ANA) ගුවන්යානය සහ A321NEO කාණ්ඩය අයත් (4R-ANE) ගුවන්යානය මේ වන විට ගුවන් මෙහෙයුම් සඳහා එක්ව තිබෙනවා.