රජයේ මූල්‍ය කළමනාකරණ හේතුවෙන් මෙවර රාජ්‍ය පොසොන් උත්සවය සදහා ප්‍රතිපාදන නොලැබෙන තත්වයක් පැවතීම කනගාටුවට කරුණක් බව ඓතිහාසික මිහින්තලා රජමහා විහාරාධිපති පූජ්‍ය වලවාහැංගුනවැවේ ධම්මරතන නායක හිමියන් පවසනවා .
නායක හිමියන් පවසන්නේ දින දහයකින් පමණ උදාවන රාජ්‍යය පොසොන් සතිය සඳහා මේ වන තෙක් ජනාධිපති කාර්යාලය, අග්‍රාමාත්‍ය කාර්යාලය, සංස්කෘතික සහ බෞද්ධ කටයුතු දෙපාර්තමේන්තුව මෙන්ම ඉහළ රාජ්‍ය නිලධාරීන් ද රාජ්‍ය පොසොන් උත්සවය මගහැර ඇති බවයි.
මෙවර පැවැත්වෙන පොසොන් උත්සවය පිළිබඳව මධ්‍යම පළාත් ආණ්ඩුකාර උතුරු මැද වැඩ බලන ආණ්ඩුකාර නීතිඥ ලලිත් යු ගමගේ මහතා ඇතුළු නිලධාරින් සමග මිහින්තලා පුද බිමෙහි දී පැවිදි විශේෂ සාකච්ඡාවකදී උන්වහන්සේ මේ බව කියා සිටියා.
උතුරුමැද වැඩබලන ආණ්ඩුකාර නීතිඥ ලලිත් යූ ගමගේ මහතා කියා සිටියේ ජනාධිපතිවරයාගේ උපදෙස් මත තමන් අද දින මෙම පොසොන් උත්සවය පිළිබඳ විශේෂ සාකච්ඡාවට එක් වූ බවත් ජනාධිපතිවරයාගේ මූල්‍ය කළමනාකරණය අනුව පොසොන් උත්සවය සැමරීමට කටයුතු කළ යුතු බවයි.
මෙහිදී නොසන්සුන්කාරී තත්ත්වයක් ඇතිවු අතර කෘෂිකර්මාන්තයෙන් ජීවත්වන පිරිසක් උතුරු මැද පළාතේ වෙසෙන බැවින් රාජ්‍ය අනුග්‍රහය මිසක වෙනත් පළාත් මෙන් පොසොන් උත්සවය සඳහා දානපතියන්ගේ දායකත්වය ලබා ගැනීමට නොහැකි බව නායක හිමියන් කියා සිටියා.
මෙම සාකච්ඡාව සඳහා උතුරු මැද පළාත් ආණ්ඩුකාර ලේකම් පලාත් සභා නියෝජ්‍ය ලේකම්, ප්‍රාදේශීය ලේකම් ඇතුළු නිලධාරීන් පිරිසක් ද එක්ව තිබෙනවා.
(ඉන්දික රංගජීව – අනුරාධපුරය)
