හිටපු අමාත්‍ය පාර්ලිමේන්තු මන්ත්‍රී මහින්දානන්ද අලුත්ගමගේ මහතාට විරුද්ධ ව පනවා ඇති නඩුවක තීන්දුව ලබන අප්‍රේල් 25 වැනි දා ප්‍රකාශ කිරීමට නියමිත බවට වාර්තා වනවා.
ඒ කොළඹ මහාධිකරණ විනිසුරු නවරත්න මාරසිංහ මහතා හමුවේ අදාළ නඩුව අද (14) කැඳවු අවස්ථාවේදියි.
අමාත්‍යවරයකු ලෙස සිටි සමයේ අයථා ලෙස උපයා ගත් බවට සැලකෙන රුපියල් ලක්ෂ 274ක මුදලක් යොදවා බොරැල්ල ප්‍රදේශයේ පිහිටි සුඛෝපභෝගී නිවසක් මිල දී ගැනීමේ සිද්ධියක් සම්බන්ධයෙන් හිටපු අමාත්‍යවරයාට මෙම චෝදනාව එල්ල වී තිබෙනවා.
නීතිපතිවරයා විසින් අමාත්‍යවරයාට එරෙහි ව මෙම නඩුව ගොනු කර තිබුණා.
නඩුව අද කැඳවූ අවස්ථාවේ නීතිපතිවරයා වෙනුවෙන් පෙනී සිටි ජ්‍යේෂ්ඨ නියෝජ්‍ය සොලිසිටර් ජනරාල් සනිල් කුලරත්න මහතා සහ විත්තිකාර මහින්දානන්ද අලුත්ගමගේ වෙනුවෙන් පෙනී සිටි ජ්‍යේෂ්ඨ නීතිඥ කාංචන රත්වත්තේ මහතා නඩුව සඳහා වාචික කරුණු ඉදිරිපත් කර තිබෙනවා.
ලිඛිත දේශන ඉදිරියේ දී භාර දීමට නියමිතයි.
