පසුගිය දින සීදූව කටුනායක ප්‍රදේශයේ හිටපු උප නගරාධිපතිවරයෙක් වන ලලිත් රොහාන් සිල්වා නැමැති පුද්ගලයා බඩල්ගම පොලිසිය විසින් පසුගිය දින හෙරොයින් සමඟ අත්අඩංගුවට ගෙන තිබෙනවා.
අත්අඩංගුවට ගත් පොහොට්ටුවේ හිටපු උප නගරාධිපතිවරයා අධිකරණයට ඉදිරිපත් කිරීමෙන් පසු සතියක කාලයක් රදැයුම් නියෝග මත ප්‍රශ්න කිරීම සඳහා මිනුවන්ගොඩ අධිකරණයෙන් බඩල්ගම පොලිසිය වෙත අවසර ලබා දී තිබුණා.
මෙම මන්ත්‍රීවරයාගෙන් වැඩිදුර ප්‍රශ්න කිරීමේදී බඩල්ගම පොලිසිය වෙත පාපොච්චාරණය කර ඇත්තේ ඔහුට කාන්තාවක් මත්ද්‍රව්‍ය ලබා දෙන බවටයි.
වහාම ක්‍රියාත්මක වුණු බඩල්ගම පොලිසියේ දූෂණ මර්දන අංශයේ ස්ථානාධිපති ඇතුළු නිලධාරීන් මෙම කාන්තාව සොයා සීදුව ප්‍රදේශයට පිටත්ව ගොස් තිබුණා.
කුලියට ලබාගත් නිවසක මෙම මත්ද්‍රව්‍ය ජාවාරමේ සැකකරුවෙක් වන එම කාන්තාව අත්අඩංගුවට ගෙන තිබෙනවා.
අත්අඩංගුවට ගත් කාන්තාවගේ කුලියට ලබාගත් නිවස පරික්ෂා කිරීමේදී අයිස් මත්ද්‍රව්‍ය ග්‍රෑම් 5 යි මිලිග්‍රෑම් 160 ක් සොයා ගැනීමට බඩල්ගම පොලිස් ස්ථානයේ දූෂණ මර්දන අංශයේ ස්ථානාධිපති ප්‍රසාද් මහතා සහ නිලධාරීන් සමත් වී තිබුණා.
මෙලෙස අත්අඩංගුවට ගෙන ඇත්තේ, වයස අවුරුදු 35 ක් පමණ කාන්තාවක් බව බඩල්ගම පොලිසිය පවසනවා.
අයිස් මත්ද්‍රව්‍ය සමග අත්අඩංගුවට ගත් කාන්තාව මිනුවන්ගොඩ අධිකරණයට ඉදිරිපත් කිරීමෙන් පසු ලබන 08 වැනිදා දක්වා මිනුමන්ගොඩ අධිකරණයෙන් රැදවුම් නියෝග ලබාදී කාන්තාවගෙන් ප්‍රශ්න කිරීමට අවසර දී තිබෙනවා.
අප කළ විමසීමකදී දූෂණ මර්දන අංශයේ ස්ථානාධිපති පැවසුවේ, ශ්‍රී ලංකා පොදුජන පෙරමුණේ හිටපු උප නගරාධිපති සහ සීදූව ප්‍රදේශයේදී අත්අඩංගුවට ගත් කාන්තාව මිනුවන්ගොඩ අධිකරණයෙන් ලබා දුන් රැදවුම් නියෝග මත බඩල්ගම පොලිසිය විසින් විමර්ශන පවත්වන බවයි.
