පවත්නා ඉන්ධන හිඟය සහ විදුලිය කප්පාදුව හේතුවෙන් එතනෝල් නිෂ්පාදනයට බාධා පැමිණීම නිසා මත්පැන් නිෂ්පාදනයට ප්‍රමාණවත් එතනෝල් නොලැබෙන බව දේශීය මත්පැන් නිෂ්පාදන සමාගම් සුරාබදු දෙපාර්තමේන්තුවට දැනුම් දී තිබෙනවා.
රජයේ තීරණයක් මත මේ වන විට එතනෝල් විදෙස් රටවලින් ආනයනය කිරීම සපුරා තහනම් කර තිබෙනවා.
කෙසේ වෙතත් ගල්ඔය සීනි කර්මාන්ත ශාලාවේ සාමාන්‍යාධිකාරී වරුණ මදුෂාන් මහතා පවසන්නේ එම කර්මාන්ත ශාලාව තුළ දෛනිකව එතනෝල් ලීටර් විසිහතර දහසක් (24000) නිපදවන බවයි.
එමෙන්ම පැල්වත්ත සීනි කර්මාන්ත ශාලාවෙන් දෛනිකව ලීටර් විසිදහසක් සහ සෙවණගල කර්මාන්ත ශාලාවෙන් දෛනිකව ලීටර් දහ අටදහසක් නිෂ්පාදනය කරනවා.
එහෙත් මෙරට ප්‍රමුඛ පෙළේ මත්පැන් නිෂ්පාදානාගාරය සුරාබදු දෙපාර්තමේන්තුවට දැනුම් දී ඇත්තේ සිය නිෂ්පාදන සඳහා එතනෝල් ලීටර අසූ දහසකට වැඩි ප්‍රමාණයක් දෛනිකව අවශ්‍ය කෙරෙන බවයි.
කෙසේ වෙතත් නියමිත පරිදි අවශ්‍ය කෙරෙන එතනෝල් ප්‍රමාණය නොලැබෙන්නේ නම් එළැඹෙන මාර්තු 22 වනදා සිට සිය මත්පැන් නිෂ්පාදනය නතර කරන බවට මෙරට ප්‍රධානම මත්පැන් නිෂ්පාදනාගාරය සුරාබදු දෙපාර්තමෙන්තුවට දැනුම් දී තිබෙනවා.
