සුපිරි බොලිවුඩ් නළු අමිතාබ් බච්චන් චිත්‍රපටියක් රූගත කිරීමක් අතරතුරදී තුවාල ලබා තිබෙනවා.
ඉන්දීය මාධ්‍ය සඳහන් කළේ බච්චන්ගේ මීළඟ චිත්‍රපටය වන “ප්‍රොජෙක්ට් කේ” චිත්‍රපටයේ ක්‍රියාදාම දර්ශනයක් රූගත කරන අවස්ථාවේදී මෙලෙස තුවාල ලබා ඇති බවයි.
රූගත කිරීම අතරතුරදී තමාගේ ඉළ ඇටවලට හානි වූ බවත් ඒ හේතුවෙන් හුස්ම ගැනීමට සහ සෙලවීම වේදනාකාරී වූ බවත් ඔහු සිය බ්ලොග් අඩවියේ සටහනක් තබමින් ප්‍රකාශ කර තිබෙනවා.
මේ වන විට ඔහු වෛද්‍ය ප්‍රතිකාර ලබා ගැනීමෙන් අනතුරුව තම නිවසේ විවේක සුවයෙන් සිටින බවයි වාර්තා වන්නේ.
බච්චන්ගේ පවුලේ ආරංචි මාර්ග පෙන්වා දෙන්නේ පුර්ණ සුවය ලබා නැවත රූගත කිරීම් සඳහා පැමිණීමට සති කිහිපයක් ගත වනු ඇති බවයි.
වැඩිදුරටත් මාධ්‍ය වෙත ප්‍රකාශයක් ලබාදෙමින් ඔහු ප්‍රකාශ කර ඇත්තේ ඉක්මන් සුව පතා නිවස අසලට මුණ ගැසීමට පැමිණීමෙන් වැළකී සිටින ලෙසයි.
