66 හැවිරිදි බ්‍රසීල ජනාධිපති ජෙයාර් බොල්සොනාරෝට දින 10 ක් අඛණ්ඩව ඉක්කාව වැළඳී තිබීම හේතුවෙන් හදිසි ශල්‍යකර්මයක් අවශ්‍ය විය හැකි යැයි ඔහුගේ කාර්යාලය පවසයි.
පරීක්ෂණ සඳහා ඔහු සාඕ පවුලෝහි රෝහලකට මාරු කරනු ලැබ තිබෙන බව මාධ්‍ය වාර්තා කරන ලදී.
ට්විටර් පණිවුඩයක් නිකුත් කරමින් ජනපති බොල්සොනාරෝ පවසා ඇත්තේ දෙවියන්ගේ කැමැත්ත අනුව තමා ඉක්මනින් ආපසු එන බවයි.
2018 දී මැතිවරණ ප්‍රචාරක කටයුතුවල යෙදී සිටියදී බොල්සොනාරෝ ජනපතිවරයා පිහි ඇණුමකට ලක් විය.
එම ප්‍රහාරයෙන් බරපතල තුවාල ලැබූ අතර ඔහුගේ රුධිරයෙන් 40% ක් අහිමි විය. පිහි ඇනීමෙන් පසු ඔහුට සැත්කම් කිහිපයක් සිදු කර තිබේ.
බදාදා අලුයම ඔහු බ්‍රසීලයේ හමුදා රෝහල වෙත ගිය අතර වෛද්‍යවරු පැවසුවේ පැය 24 ත් 48 ත් අතර කාලයක් ඔහු නිරීක්‍ෂණය කරන බවයි.
නමුත් එදිනම ජනාධිපති කාර්යාලය පැවසුවේ 2018 දී බොල්සොනාරෝ මහතාට සැත්කම් කළ ශල්‍ය වෛද්‍ය ඇන්ටෝනියෝ ලුයිස් මැසිඩෝ අතිරේක පරීක්ෂණ සහ ශල්‍යකර්ම සඳහා ජනාධිපතිවරයා සාඕ පවුලෝ වෙත මාරු කරන ලෙස නිර්දේශ කර ඇති බවයි.
