මිලියනයක් ටිබෙට් ළමයින් බලහත්කාරයෙන් රඳවා ගනු ලැබ සිටින, ඔවුන්ගේ ටිබෙට් සංස්කෘතික අනන්යතාවය අතුගා දැමීමට සහ ඔවුන්ව චීන හන් සංස්කෘතියට අනුගත කරගැනීම සඳහා ක්රියාත්මක වන චීන රජය පවත්වාගෙන යනු ලබන පාසල් දාමයක් පිළිබඳ කම්පන සහගත හෙළදරව්වක් සිදුකරමින් එක්සත් ජාතීන්ගේ මානව හිමිකම් කවුන්සිලය පසුගිය පෙබරවාරි 06 වැනිදා ජිනීවාහිදී මාධ්ය නිවේදනයක් නිකුත් කර ඇත.
සුළුතර ගැටළු, අධ්යාපනික අයිතිවාසිකම් සහ සංස්කෘතික අයිතිවාසිකම් සම්බන්ධයෙන් එක්සත් ජාතීන්ගේ විශේෂ නියෝජිතයන් වන Fernand de Varennes, Farida Shaheed සහ Alexandra Xanthaki යන විශේෂඥයින් තිදෙනා ඔවුන්ගේ ඒකාබද්ධ ප්රකාශයේ සඳහන් කර ඇත්තේ, “පසුගිය වසර කිහිපයේදී ටිබෙට් ජාතිකයින් සඳහා වන නේවාසික පාසල් පද්ධතිය පිළිබඳව අපි ඉතා කනස්සල්ලට පත්ව සිටිමු. ජාත්යන්තර මානව හිමිකම් ප්රමිතීන්ට පටහැනිව, බහුතර හන් සංස්කෘතියට ටිබෙට් ජාතිකයන් උකහා ගැනීම අරමුණු කරගත් අනිවාර්ය මහා පරිමාණ වැඩසටහනක් ලෙස පෙනේ. ” යනුවෙනි.
විශේෂඥයින්ගේ අධ්යයනයේ දී, ඔවුන්ගේ පවුල්වලින් බලහත්කාරයෙන් රැගෙන යන ටිබෙට් දරුවන් ටිබෙට් ස්වයං පාලන කලාපය (TAR) තුල මෙන්ම යාබද චීන පළාත්වල විශේෂයෙන් ස්ථාපිත පාසල්වල ස්ථිරවම නතර කරගෙන සිටින බව ඔවුන් සොයාගෙන තිබේ.
ටිබෙටයේ පිටුවහල් කරන ලද ආධ්යාත්මික නායක දලයි ලාමා විසින් පිහිටුවන ලද මධ්යම ටිබෙට් පරිපාලනය ඇතුළු විවිධ ටිබෙට් කණ්ඩායම් විසින් නැවත නැවතත් චෝදනා කරන පරිදි, ටිබෙට් භාෂාවෙන් අධ්යාපනය ටිබෙටය පුරා තහනම් කර ඇති අතර අධ්යාපන මාධ්යය මැන්ඩරින් චීන භාෂාව පමණක් කර ඇත.
ටිබෙට් භාෂා ඉගැන්වීම සඳහා ටිබෙට් ස්වේච්ඡා සේවකයන් විසින් පවත්වාගෙන යනු ලබන ප්රජා පාසල් වසා දැමීම, සමූලඝාතනය කිරීම සහ ගුරුවරුන් සිරගත කිරීම වැනි සිද්ධීන් බොහොමයක් වාර්තා වේ.