තමා සම්බන්ධයෙන් පළ කර ඇති අසත්‍ය ප්‍රකාශවලට එරෙහිව මාර්ගගත ආරක්ෂණ පනත මඟින් පියවර ගන්නා ලෙස ඉල්ලමින් සංචාරක හා ඉඩම් අමාත්‍ය හරීන් ප්‍රනාන්දු මහතා පොලිස්පතිවරයා වෙත ලිපියක් යොමු කර තිබෙනවා.
හරීන් ප්‍රනාන්දු අමාත්‍යවරයා ඊයේ (03) පැවති ප්‍රවෘත්ති සාකච්ඡාවක් අමතින් මේ බව සඳහන් කළා.
විදෙස් සංචාරකයින් වෙත වීසා නිකුත් කිරීමේදී පසුගියදා කටුනායක ගුවන් තොටුපළේදී ඇති වූ ආන්දෝලනාත්මක තත්වය හමුවේ , අදාළ වීසා නිකුත් කිරීමේ ක්‍රියාවලිය ඉන්දීය සමාගමක් වෙත පවරා ඇති බවට එල්ල වූ චෝදනා සම්බන්ධයෙන් ප්‍රතිචාර දක්වමින් අමාත්‍යවරයා මේ බව පවසා සිටියා.
එහිදී වැඩිදුරටත් අදහස් දැක්වූ හරීන් ප්‍රනාන්දු මහතා,
“මේ සම්බන්ධයෙන් මම පොලිස්පතිවරයාට ලිඛිතව දැනුම් දුන්නා. ඒ වගේම මේ ප්‍රකාශවලට එරෙහිව මම මාර්ගගත ආරක්ෂණ පනතේ විධිවිධාන යටතේ පැමිණිල්ලක් ඉදිරිපත් කරනවා. වීසා නිකුත් කිරීමේ ක්‍රියාවලිය ඉන්දියානු සමාගමකට පවරා දීම පිටිපස්සේ ඉන්නේ මම කියලා සමාජ මාධ්‍යවල අසත්‍ය වාර්තා පළ වෙලා තිබුණා.
ගුවන් තොටුපළවල් එන්නේ නිමල් සිරිපාල ද සිල්වා අමාත්‍යවරයා යටතේ පවතින සිවිල් ගුවන් සේවා අධිකාරිය යටතට. ආගමන කටයුතු අයිති වෙන්නේ අමාත්‍ය ටිරාන් අලස්ගේ විෂය පථයට. මගේ කිසිම සම්බන්ධයක් නැහැ. ගුවන් තොටුපල කළමනාකරණය සහ ආගමන කියන්නේ එකිනෙකට වෙනස් ක්ෂේත්‍ර දෙකක්.”
