මැතිවරණ කොමිෂන් සභාව වෙත මැතිවරණ සමයකදී මාධ්‍ය නියාමනය කිරීමට ඊට අදාළ නීති රීති පමණක් නොව ඒවා ක්‍රියාත්මක කිරීමටද බලය තිබිය යුතු බව මැතිවරණ කොමිසමේ අධ්‍යක්ෂ ජනරාල් සමන් ශ්‍රී රත්නායක මහතා පවසනවා.
කොළඹ අද (08) පැවති ප්‍රවෘත්ති සාකච්ඡාවකට එක්වෙමින් ඒ මහතා පෙන්වා දුන්නේ මෙවැනි නීති පැවතියද ඒවා ක්‍රියාත්මක කිරීමට යෑමේදීද ගැටලු රැසක් ඇතිවිය හැකි බවයි.
නීතිමය වශයෙන් මැතිවරණ සමයකදී මාධ්‍ය උපමාන ක්‍රියාත්මක කිරීමට වඩා එකඟතාවයෙන් හා අවබෝධයෙන් අදාළ උපමාන ක්‍රියාත්මක කළ යුතු බව සමන් ශ්‍රී රත්නායක මහතා මෙහිදී වැඩිදුරටත් සඳහන් කළා.
එකඟතාවයන් කොපමණ පැවතියද මැතිවරණ කොමිසමට ‘දත්’ තිබිය යුතු බව මෙහිදී අදහස් දක්වමින් නීතිඥ විරංජන හේරත් මහතා පවසා සිටියා.
ඊට ප්‍රතිචාර දක්වමින් සමන් ශ්‍රී රත්නායක මහතා සදහන් කළේ ‘ දත් පමණක් නොව හැපීමේ හැකියාවද මැතිවරණ කොමිසම සතුවිය යුතු වුවත් ඒවා ක්‍රියාත්මක කිරීමේදී ඉතිහාසය පුරාම ගැටළු ඇති වූ බවයි.
