යුරෝ කුසලාන පාපන්දු තරගාවලියේ සුපරි 16 දෙනාගේ කාණ්ඩයේ තවත් තරග දෙකක් ඊයේ (28) පැවැත්වුණා.
පළමු තරගය පැවැත්වුණේ ස්පාඤ්ඤය සහ ක්‍රොඒෂියාව අතරයි.
තරගයේ පළමු අර්ධය නිමාවන විට කණ්ඩායම් දෙකම ගෝල 1-1ක් ලෙස සම තත්ත්වයේ පසුවුණා.
දෙවන අර්ධයේදී කණ්ඩායම් දෙකම තවත් ගෝල 2 බැගින් ලබා ගැනීම හේතුවෙන් නියමිත කාලය අවසන් වනවිට 3-3ක් ලෙස තරගය සම තත්ත්වයක පැවතීම හේතුවෙන් ජයග්‍රාහකයන් තේරීම සඳහා අතිරේක කාලයක් දක්වා තරගය දීර්ඝ වුණා.
අතිරේක කාලයේදී ප්‍රතිවාදී ක්‍රොඒෂියාවට එරෙහිව ප්‍රබල හා ආක්‍රමණශීලී තරග රටාවකට අවතීර්ණ වූ ස්පාඤ්ඤය තවත් ගෝල දෙකක් ලබා ගැනීමට සමත් වුණා.
ඒ අනුව 5-3ක් ලෙස තරගයේ ජයග්‍රහණය තහවුරු කරගැනීමට ස්පාඤ්ඤය සමත් වුණේ අර්ධ අවසන් පූර්ව වටයේ ස්ථානය ද පහසුවෙන් වෙන් කරගනිමින්.
මෙම තරගය ඉතිහාසයට එක්වන්නේ යූරෝ කුසලාන තරග ඉතිහාසයේ දෙවැනියට වැඩිම ගෝල සංඛ්‍යාවක් (08) වාර්තා වූ තරගය ලෙසයි.
යූරෝ කුසලාන තරගාවලි ඉතිහාසයේ වැඩිම ගෝල සංඛ්‍යාවක් (09) වාර්තා වූ තරගය වන්නේ 1960 වසරේ ප්‍රංශය (05) හා යුගෝස්ලාවියාව (04) අතර පැවති අවසන් පූර්ව තරගයයි.
