එන්නත ලබා ගැනීමෙන් පසුවත් මුඛ ආවරණ පැලඳීම වැනි සෞඛ්‍ය පුරුදු පිළිපැදීමට පියවර ගන්නා ලෙස චීනයේ රෝග පාලනය හා වැළැක්වීමේ මධ්‍යස්ථානය ජනතාවගෙන් ඉල්ලා සිටිනවා.
ජූලි මාසයේදී චීනයෙන් වාර්තා වූ කොවිඩ්-19 ආසාදිතයන් ප්‍රමාණයේ ඉහළ යාමත් සමඟ ඔවුන් මේ බව ප්‍රකාශ කර තිබෙනවා.
කොවිඩ් වෛරසයේ ඩෙල්ටා ප්‍රභේදයේ ව්‍යාප්තිය හේතුවෙන් වාර්තාවන කොවිඩ්-19 ආසාදිතයන් ප්‍රමාණය ඉහළ යා හැකි බවයි චීනයේ රෝග පාලනය හා වැළැක්වීමේ මධ්‍යස්ථානය පවසන්නේ.
ඩෙල්ටා ප්‍රභේදය බෝවීම මුල් කොවිඩ්-19 ප්‍රභේදවලට වඩා අවම වශයෙන් දෙගුණයක වේගයෙන් සිදුවන බව පෙන්වා දෙන චීන සෞඛ්‍ය බලධාරීන් වැඩිදුරටත් පවසන්නේ එන්නත ලබාගත් අයටද වෛරසය ආසාදනය වූ තත්ත්වයන් වාර්තා වන බවයි.
එබැවින්, මේ අවස්ථාවේදී ජනතාව නිසි සෞඛ්‍ය පුරුදු පිළිපැදිය යුතු බවත් එන්නත්කරණය තවදුරටත් සිදු කිරීමෙන් අනතුරුව මෙම අවදානම පහව යනු ඇති බවත් ඔවුන් පවසනවා.
