තිලිණි ප්‍රියමාලිගේ මුල්‍ය වංචාවක් සම්බන්ධයෙන් සැකපිට අත්අඩංගුවට ගත් පුජ්‍ය බොරැල්ලේ සිරිසුමන හිමි ලබන 16 වනදා දක්වා රක්ෂිත බන්ධනාගාර ගත කර කිරීමට කොළඹ කොටුව මහේස්ත්‍රාත් අධිකරණය අද (02) නියෝග කළා.
ඒ අත්අඩංගුවට ගත් උන්වහන්සේ අධිකරණය වෙත අද (02) පෙරවරුවේ ඉදිරිපත් කළ අවස්ථාවේදීයි.
ඊයේ (01) හවස අපරාධ පරීක්ෂණ දෙපාර්තමේන්තුව විසින් තිලිණි ප්‍රියමාලිගේ මුල්‍ය වංචා චෝදනා සම්බන්ධයෙන් සිදු කෙරෙන පරීක්ෂණවලට අදාළව සිරිසුමන හිමි අත්අඩංගුවට ගනු ලැබුවා.
කඩවත පිහිටි විහාරස්ථානයේ දී උන්වහන්සේ අත්අඩංගුවට ගෙන ඇති අතර වැඩිදුර ප්‍රශ්ණ කිරීම් සඳහා අපරාධ පරීක්ෂණ දෙපාර්තමේන්තුව වෙත රැගෙන එනු ලැබුවා.
තිලිණි ප්‍රියමාලිගේ ව්‍යාපාර සඳහා ආයෝජනය කිරීමට හවුල්කරුවන් සොයා ගැනීම වෙනුවෙන් මෙම භික්ෂුව සහය ලබාදී ඇති බවයි එම දෙපාර්තමේන්තුවේ ආරංචි මාර්ග වාර්තාවල සඳහන් වන්නේ.
මේ අතර මුල්‍ය වංචාව සිද්ධිය සම්බන්ධයෙන් අත්අඩංගුවට ගෙන ඇති තිලිණි ප්‍රියමාලිගේ පෙම්වතා බවට සැලකෙන ඉසුරු බණ්ඩාර සහ ඇයගේ සමාගමක අධ්‍යක්ෂකවරයෙක් වන කසුන් පෙරේරා ලබන 16 වනදා දක්වා යළි රක්ෂිත බන්ධනාගාර ගත කිරීමට කොළඹ කොටුව මහේස්ත්‍රාත් තිලිණ ගමගේ මහතා අද (02) නියෝග කළා.
තිලිණි ප්‍රියමාලි සහ ඇගේ පෙම්වතා ස්කයිප් තාක්ෂණය ඔස්සේ අද (02) අධිකරණය වෙත ඉදිරිපත් කර ඇති බවයි වැඩිදුරටත් වාර්තා වන්නේ.
