ප්‍රසිද්ධ මාධ්‍ය හමුවක දී තමන්‌ විසින් කූරගල විහාරස්ථානය සම්බන්ධයෙන් සිදු කරන ලද ප්‍රකාශයේ දී මුස්ලිම් ප්‍රජාවට යම්‌ අපහසුතාවක්‌ සිදුවී නම්‌ ඒ සම්බන්ධයෙන් සමාව අයැද සිටින බව ගලගොඩඅත්‌තේ ඥානසාර හිමියන් ප්‍රකාශ කර තිබෙනවා.
ඒ එම සිදුවීම සම්බන්ධව ඊයේ (15) කොළඹ මහාධිකරණයේ පැවති නඩු විභාගයේ දී .
මෙම නඩු විභාගය මහාධිකරණ විනිසුරු ආදිත්‍ය පටබැඳිගේ ඉදිරිපිට පැවති අතර එහිදී විත්ති කූඩුවේ සිට උන්වහන්සේ කනගාටුව ප්‍රකාශ කළ බවයි වාර්තා වන්නේ.
මෙම සිදුවීම සම්බන්ධ නඩුවේ සාක්ෂි විභාගය ඊයේ දින අවසන්‌ වූ අතර නඩුවේ තීන්දුව ලබන මාර්තු මස 28 වැනි දින ලබාදෙන බව විනිසුරුවරයා ප්‍රකාශ කර තිබෙනවා.
2016 වසරේ මාර්තු මස 30 වැනි දින පැවැති මාධ්‍ය සාකච්ඡාවක්‌ අතරතුර දී කූරගල විහාරස්ථානය සම්බන්ධයෙන් සිදුකරන ලද ප්‍රකාශයක දී ජාතික හා ආගමික සංහිඳියාවට හානියක්‌ වන අයුරින්‌ ප්‍රකාශයක්‌ නිකුත්‌ කළේ යැයි නීතිපතිවරයා විසින් බොදුබල සේනා නමැති සංවිධානයේ මහ ලේකම්‌ ගලගොඩඅත්‌තේ ඥානසාර හිමිට එරෙහිව මෙම නඩුව කොළඹ මහාධිකරණය හමුවේ ගොනුකර තිබුණා.
