ශ්‍රී ලංකාව හා සම්බන්ධ රූපලාවණ්‍ය තරඟාවලි නියාමනය කිරීම සඳහා නීති රීති හඳුන්වා දීමට රජය තීරණය කර තිබෙනවා.
2020 ශ්‍රී ලංකා විවාහක රූ රැජින තරඟාවලියේ අවසන් තරඟයේදී ඇතිවූ මතභේදාත්මක සිද්ධියෙන් පසුව මෙම තීරණය ගෙන ඇති බවයි වාර්තා වන්නේ.
තරඟයේ ජයග්‍රාහකයා වූ පුෂ්පිකා ද සිල්වා මහත්මිය හා ලෝක විවාහක රූ රැජින වූ කැරොලයින් ජූරි මහත්මිය අතර ඇතිවූ සිදුවීමේ ප්‍රතිපලයක් ලෙස කැරොලයින් ජූරි මහත්මිය හා හිටපු නිරූපිකාවක් වන චූලා පද්මේන්ද්‍ර යන අයව අත්අඩංගුවට ගෙන ඇප මත මුදා හරිනු ලැබුවා.
ඩේලි මිරර් පුවත්පතට අදහස් දක්වමින් කාන්තා හා ළමා සංවර්ධන රාජ්‍ය අමාත්‍ය පියල් නිශාන්ත මහතා කියා සිටියේ එම සිදුවීමේ ප්‍රතිපලයක් ලෙස ශ්‍රී ලංකාවේ නම භාවිතා කරමින් පවත්වනු ලබන ඕනෑම නිරූපන උත්සවයක් නිරීක්ෂණය කිරීම අත්‍යවශ්‍ය බවයි.
කාන්තාවන් හා ළමුන් සම්බන්ධ පෞද්ගලික සිදුවීම් නියාමනය කිරීම සඳහා මාර්ගෝපදේශ සකස් කිරීමට මේ වන විටත් සාකච්ඡා කරමින් සිටින බවද රාජ්‍ය අමාත්‍යවරයා සදහන් කර තිබෙනවා.
රාජ්‍ය අමාත්‍යවරයා වැඩිදුරටත් සඳහන් කර ඇත්තේ විවාහක රූ රැජින තරඟාවලිය වැනි තරඟ ජාත්‍යන්තර ප්‍රමිතීන්ට අනුකූල වන පරිදි නියාමනය කළ යුතු බවෙයි.
මේ සම්බන්ධයෙන් පොදු එකඟතාවකට පැමිණීම සඳහා අමාත්‍යාංශය, පෞද්ගලික සංවිධාන සමඟ සාකච්ඡා පවත්වන බවද ඔහු පුවත්පත සමඟින් පවසා තිබෙනවා.
