කාන්තාවකට අතවර කිරීමේ චෝදනාවට සිරභාරයට ගෙන ඇප මත නිදහස්ව සිටින ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලකගෙන් නඩුව නැවත විමසීම පෙබරවාරි 23 වනදා කල් දමා තිබෙනවා.
එම නඩුව අද (12) සිඩ්නිහි ඩව්නිං සෙන්ටර් අධිකරණයේදී කැඳවූ අවස්ථාවේදී මෙම තීරණය දැනුම් දී ඇති බවයි වාර්තා වන්නේ.
සිඩ්නි හි නැගෙනහිර රෝස් බේ හි පදිංචි 29 හැවිරිදි තරුණියක් ගොණු කළ ලිංගික අතවර කිරීමේ සිද්ධියක් සම්බන්ධයෙන් වූ පැමිණිල්ලකට අදාළව ධනුෂ්ක ගුණතිලකව නොවැම්බර් මස 06 වනදා ශ්‍රී ලංකා කණ්ඩායම රැඳී සිටි හෝටලයේ දී සිඩ්නි පොලිසිය විසින් අත්අඩංගුවට ගනු ලැබුවා.
ඒ අනුව දින 11ක් පාර්ක්ලීහී පිහිටි රැඳවුම් මධ්‍යස්ථානයක රඳවා තැබීමෙන් අනතුරුව ඕස්ට්‍රේලියානු ඩොලර් ලක්ෂ දෙක මුදල් ඇපයක් මත ධනුෂ්කව මුදා හැරියේ නොවැම්බර් 17 වනදායි.
කෙසේ නමුත් ධනුෂ්ක ගුණතිලකට දැඩි කොන්දේසි රැසක් එහිදී පැනවූ අතර එහිදී ධනුෂ්කට රාත්‍රී 9 සිට උදෑසන 6 දක්වා ගමන් බිමන් ද තහනම් කළා.
තවද පැමිණිලිකාරිය ඇමතීමට හෝ සම්බන්ධ කර ගැනීමට කටයුතු කිරීමෙන් වැළකීම සහ ටින්ටර් ඇතුළු ජංගම දුරකථන යෙදවුම් භාවිතයෙන් වැළකීමද එම ඇප කොන්දේසි අතර වුණා.
ඒ අනුව (12) අද අධිකරණයේ නඩුව කැඳවූ අවස්ථාවේදී ප්‍රකාශ කර ඇත්තේ එම දැඩි නීති ඉදිරියටත් වලංගු බවයි.
ධනුෂ්ක ගුණතිලකගේ නඩුව යළි පෙබරවාරි 23 වනදා කැඳවීමට නියමිතයි.
