ජාත්‍යන්තර ස්වෛරී බැඳුම්කර හිමියන් සමඟ ශ්‍රී ලංකාවේ සාකච්ඡා සඳහා සහාය වීමට සූදානම් බව ජාත්‍යන්තර මූල්‍ය අරමුදල (IMF) පවසා තිබෙනවා.
ජාත්‍යන්තර මූල්‍ය අරමුදලේ ප්‍රකාශකයෙකු සඳහන් කර ඇත්තේ අදාළ පාර්ශවයන් සමඟ පතිපත්තිමය එකඟතාවයකට පැමිණීමෙන් අනතුරුව මේ සම්බන්ධයෙන් විධිමත් තක්සේරුවක් ලබා දෙන බවයි.
මෙරටට ලබා දී ඇති ණය මුදලේ තෙවැනි වාරිකයට විධායක කමිටු අනුමැතිය ලබා දීමට ප්‍රථමයෙන් ජාත්‍යන්තර මූල්‍ය අරමුදලේ වැඩසටහනට සහ ණය හිමියන්ට විනිවිදභාවයකින් යුතුව කටයුතු කළ හැකි වන ආකාරයේ ගිවිසුමකට ශ්‍රී ලංකාව එළඹෙනු ඇති බවට විශ්වාස කරන බවට ජාත්‍යන්තර මූල්‍ය අරමුදල තවදුරටත් සඳහන් කර තිබෙනවා.
ඇමෙරිකානු ඩොලර් බිලියන 12ක වටිනාකමින් යුත් ජාත්‍යන්තර බැඳුම්කර ප්‍රතිව්‍යුහගත කිරීම සඳහා බැඳුම්කරහිමියන් සමඟ ගිවිසුමකට එළඹීමට අපොහොසත් වූ බව ශ්‍රී ලංකාවේ බලධාරීන් පසුගියදා දැනුම් දුන්නා.
ඒත් සමඟම ජාත්‍යන්තර මූල්‍ය අරමුදල මෙරටට ලබා දී ඇති ණය මුදලේ තෙවැනි වාරිකය ජූනි මස ලබා ගැනීමට නොහැකිවනු ඇති බවටද අදහස් පළ වුණා.
