2023 ලෝක කුසලාන එක්දින ක්රිකට් තරඟාවලියේ ශ්රී ලංකාව සහ ඉන්දියාව අතර තරඟය අද (02) පැවැත්වෙනවා.
වන්කඩේ ක්රීඩාංගණයේදී මෙම තරඟය පැවැත්වීමට නියමිත අතර, 2011 ලෝක කුසලාන අවසන් මහා තරගයේ දී අවසන් වරට ශ්රී ලංකාව හා ඉන්දියාව වන්කඩේ ක්රීඩාංගණයේදී හමු වී තිබුණා.
මෙම තරඟය ඉතාමත් තීරණාත්මක වන අතර ශ්රී ලංකාවට අවසන් පූර්ව වටයට සුදුසුකම් ලැබීමේ බලාපොරොත්තුව තවදුරටත් රඳවා ගන්නට නම් ඔවුන්ට ඉතිරිව තිබෙන තරඟ තුනම ජයගෙන ශුද්ධ ලකුණු වේගයද ඉහළ මට්ටමක රඳවා ගත යුතු වෙනවා.
මීට අමතරව ඕස්ට්රේලියාව හෝ නවසීලන්තය සහභාගීවන මීළඟ තරග තුනෙන් දෙකක් පරාජය වන්නටත් සිදුවනවා.
එමෙන්ම, මේ වන විට ලෝක කුසලාන තාර්ඟාවලිය තුළ අපරාජිතව සිටින ඉන්දියානුවන් මෙම තරඟය ජයගත හොත් ඔවුන් අවසන් පූර්ව වටයට සුදුසුකම් ලබනවා.
ශ්රී ලංකාව සහ ඉන්දියාව එක්දින ලෝක කුසලානයකදී තරඟ වදින 10 වැනි අවස්ථාව මෙය වන අතර ඉන් අවස්ථා 4 බැඟින් දෙපිලම ජය ගනිද්දී එක් තරඟයක් විසඳුමකින් තොරව අවසන් වුණා.
කෙසේවෙතත්, ඉන්දීය කණ්ඩායම 2007 ලෝක කුසලානයෙන් පසු ශ්රී ලංකාව හමුවේ පරාජය වී නැහැ.
අද තරඟයට එක්වන ශ්රී ලංකා කණ්ඩායමේ එක් වෙනස්කමක් සිදුකරමින් ධනංජයද සිල්වා වෙනුවට දුනිත් වෙල්ලාලගේ කැඳවීමටද ඉඩ පවතින බව ක්රිකට් ආරාංචි මාර්ග සඳහන් කරනවා.
ඒ අතරවාරයේදී, අතිරේක වේග පන්දු යවන්නෙකු ලෙස ප්රමෝද් මධුශාන් කණ්ඩායම සමඟ එක්ව තිබෙනවා.