පහර දීමක් හේතුවෙන් තරුණයෙකුගේ වෘෂණ කෝෂයක් ඉවත් කිරීමට සිදු වීමේ සිද්ධිය සම්බන්ධයෙන් අත්අඩංගුවට ගත් මැදවච්චිය පොලිසියේ දූෂණ මර්දන අංශයේ ස්ථානාධිපතිවරයා ලබන 15 වනදා දක්වා රක්ෂිත බන්ධනාගාර ගත කර තිබෙනවා.
සිද්ධීයට අදාළ නඩුව අද (08) මැදවච්චිය මහේස්ත්රාත් නිමේෂා ධර්මදාස හමුවේ කැඳවූ අවස්ථාවේදී මෙම තීරණය ලබා දී තිබෙනවා.
මන්නාරම – මැදවච්චිය මාර්ගයේ මැදවච්චිය ප්රාථමික විද්යාලය ආසන්නයේදී අණ නොතකා ධාවනය කළ බව කියන කුඩා ලොරි රථයක රියදුරුට සහ සහයකයාට පොලිසිය විසින් පසුගියදා පහරදී තිබුණා.
සිද්ධිය සම්බන්ධයෙන් අත්අඩංගුවට ගත් පොලිස් සැරයන්වරයෙකු සහ කොස්තාපල්වරයා මේ වන විට රක්ෂිත බන්ධනාගාර ගත කර සිටිනවා.
ඔවුන්ට ඇප ලබා දෙන ලෙස අදාළ නිලධාරීන්ගේ නීතිඥයින් කළ ඉල්ලීමද මහේස්ත්රාත්වරිය ප්රතික්ෂේප කළා.
සිද්ධිය සම්බන්ධයෙන් තවත් පොලිස් නිලධාරීන් තිදෙනෙකු අත්අඩංගුවට ගැනීමට නියමිත බවත් ඔවුන් පදවිය සහ කැබතිගොල්ලෑව පොලිස් ස්ථානවල මේ වන විට සේවය කරන බවත් අපරාධ පරීක්ෂණ දෙපාර්තමේන්තුව තවදුරටත් දැනුම් දෙනවා.