ඉන්දීය අගමැති නරේන්ද්‍ර මෝදි දෙදින නිල සංචාරයක් සඳහා ඊයේ (08) රුසියාව වෙත පැමිණ තිබුණා.
රුසියාවේ යුක්‍රේන ආක්‍රමණයෙන් පසුව මෝදී රුසියාවේ සංචාරය කරන පළමු අවස්ථාව ලෙස මෙම සංචාරය ඉතිහාසයට එක්වනු ඇති.
මොස්කව් නුවර වින්යුකෝවා ජාත්‍යන්තර ගුවන්තොටුපොළ රතු පලස මතින් පැමිණි ඉන්දීය අගමැතිවරයාව රුසියානු රජයේ පළමු නියෝජ්‍ය සභාපති ඩෙනිස් මොන්චියෙරොෆ් විසින් පිළිගත් බවට විදෙස් මාධ්‍ය වාර්තා පවසනවා.
සංචාරයේ පළමු දිනය වූ ඊයේ අගමැති මෝදි රුසියානු ජනාධිපති ව්ලැ‍දිමීර් පුටින් හමුව මොස්කව් නුවර ආසන්නයේ පිහිටි ජනාධිපති නිල නිවසේදී පවත්වා තිබෙනවා.
එහිදී අගමැති මෝදි වඩාත් ලෙන්ගතුව පිළිගත් ජනාධිපති පුටින් ඔහුට හිතවත් මිතුරා ලෙස ආමන්ත්‍රණය කර තිබුණු බවද විදෙස් මාධ්‍ය වාර්තා කරනවා.
තෙවැනි වරටත් ඉන්දීය අගමැති ධුරයට පත්වීම ගැන මෝදි ට සුබ පැතීමට මෙහිදී ජනපති පුටින් කටයුතු කර තිබුණා.
තවද අගමැති මෝදි ඊයේ රාත්‍රියේ ජනපති පුටින් සමඟ පැවති පෞද්ගලික භෝජන සංග්‍රහය අතරතුරදීත් සාකච්ඡාවකට එක්වූ බවටද වාර්තා වනවා.
එහිදි දෙරට අතර පවතින වෙළෙඳ සබඳතා තර කරගැනීම සහ ඉන්දීය ජනතාව නොමඟ ගොස් රුසියානු යුද්ධයේ සටන් වැදීම යන කරුණු සම්බන්ධයෙන් වැඩි අවධානය යොමුවී තිබෙන අතර රුසියාව වෙනුවෙන් යුක්‍රේනයේ යුද වැදී සිටින ඉන්දීය සෙබලු නිදහස් කිරීමට ජනපති පුටින් මෙහිදී එකඟ වු බවට පැවසෙනවා.
රාජ්‍ය නායකයින් අතර නිල ද්වීපාර්ශ්වීය සාකච්ඡා අද (09) මොස්කව් නුවර ක්‍රෙම්ලින් ගොඩනැගිල්ලේදී පැවැත්වෙනවා.
අදාළ සාකච්ඡා ඉතා පුද්ගලික මට්ටමෙන් පැවැත්වෙන බව ක්‍රෙම්ලින් ප්‍රකාශක දිමිත්‍රි පෙස්කොෆ් සඳහන් කළ බව විදෙස් වාර්තා පවසනවා.
රුසියානු සංචාරය අවසන් වීමෙන් පසු අගමැති මෝදි අමෙරිකාවේ වොෂින්ටන් නුවර බලා ගමන් කිරීමට නියමිතයි.
ඒ අද සිට ලබන බ්‍රහස්පතින්දා දක්වා පැවැත්වෙන නේටෝ සමුළුවට එක්වීමේ අරමුණින්.
