ඇෆ්ගනිස්ථානයේ පාලනය අල්ලා ගැනීමෙන් පසු තලේබාන් සංවිධානය සිය පළමු ප්‍රවෘත්ති සාකච්ඡාව අද (18) පැවැත්වූ අතර ඔවුන්ගේ මාධ්‍ය ප්‍රකාශකයා වන සබිහුල්ලා මුජාහිඩ් පළමුවරට මාධ්‍ය හමුවේ ඔහුව නිරාවරණය කිරීමට කටයුතු කළා.
මෙම ඓතිහාසික ප්‍රවෘත්ති සාකච්ඡාවේදී මුජාහිඩ් මහතා මාධ්‍යවේදීන්ගේ පුළුල් පරාසයක ප්‍රශ්නවලට පිළිතුරු දෙමින් ප්‍රකාශ කළේ “ඉස්ලාමීය නීතියේ රාමුව තුළ” කාන්තාවන්ගේ අයිතිවාසිකම් වලට ගරු කරන බවයි.
බොහෝ මාධ්‍යවේදීන් ඔහුගේ මුහුණ දුටු පළමු අවස්ථාව මෙය බව පැවසෙනවා.
වසර ගණනාවක් ඔහු සෙවනැල්ලක් ලෙස ක්‍රියා කර ඇති අතර බොහෝ විට ඔහුගේ ප්‍රකාශ ලබා දුන්නේ දුරකථනය ඔස්සේ ඔහුගේ හඬින් පමණයි.
බොහෝ මාධ්‍යවේදීන් දශකයකටත් වැඩි කාලයක් ඔහු සමඟ ගණුදෙනු කර ඇතත් ඔහුගේ මුහුණ දැක තිබුණේ නැහැ.
මෙය තමන් දැඩි ලෙස කම්පනයට පත් වූ මොහොතක් බව යුද වාර්තාකරණයේ නියැළුණු මාධ්‍යවේදීන් සමාජ මාධ්‍ය ඔස්සේ ප්‍රකාශ කළා.
