උතුරු මැද රෝහල් සේවකයින් අද වර්ජනයක

සෞඛ්‍ය වෘත්තිය සමිති 72 ක් අද (09) උතුරුමැද පළාතේ සියලු රජයේ රෝහල්වල වැඩවර්ජනයක නිරත වීමට තීරණය කර තිබෙනවා.

ඒ, ආර්ථික යුක්තිය ඉටු කිරීමට අදාළව ඉදිරිපත් කළ ඉල්ලීම්වලට සෞඛ්‍ය අමාත්‍යාංශය විසඳුම් ලබා දෙන බව පැවසුවත් එය ක්‍රියාත්මක නොකිරීමට විරෝධය පල කරමින්.

හෙද නිලධාරීන්, මහජන පරීක්ෂකවරුන්, රසායානාගාර ශිල්පීන්, විකිරණ තාක්ෂණවේදීන්, ඖෂධවේදීන් ඇතුලු වෘත්තීය සමිති 72 ක සාමාජිකයින් ඊට අතුලත්.

ඒ අනුව උදෑසන 8 සිට දහවල් 12 දක්වා උතුරුමැද පළාතේ සියළු රජයේ රෝහල්වල මෙම වැඩවර්ජනය ක්‍රියාත්මක බව, සෞඛ්‍ය සේවා වෘත්තිය සමිති සන්ධානයේ කැඳවුම්කරු රවී කුමුදේශ් මහතා සඳහන් කළා.

13 වැනිදා මධ්‍යම පළාතේත්, 14 වැනිදා සබරගමුව පළාතේ රජයේ රෝහල්වල මෙම වැඩවර්ජනය ක්‍රියාත්මක කිරීමට නියමිතයි.

අද දින පැවැත්වෙන වර්ජනය සඳහා හෙද හෙදියන්ගේ සහභාගීත්වයක් සිදුනොවන බව සමස්ත ලංකා හෙද සංගමය සඳහන් කරනවා.

වෘත්තීය ක්‍රියාමාර්ගය ක්‍රියාත්මක කරන රෝහල් පිළිබඳ විස්තර පහතින්,

09 – උතුරු මැද පළාත
13 – මධ්‍යම පළාත
14 – සබරගමුව පළාත
15 – වයඹ පළාත
16 – දකුණු පළාත
20 – ඌව පළාත
21 – බස්නාහිර පළාත යනාදී වශයෙන් මෙම වර්ජන ක්‍රියාමාර්ගය ක්‍රියාත්මක වනු ඇති.