දිස්ත්‍රික්ක 7ක වී මිලදී ගැනීම සඳහා අද (14) සිට අයැදුම්පත් නිකුත් කිරීම හා සාම්පල් පරීක්ෂාව ආරම්භ කරන බව වී අලෙවි මණ්ඩලය පවසනවා.
එහි සභාපති බුද්ධික ඉද්දමල්ගොඩ මහතා පැවසුවේ, එම ප්‍රදේශවල හෙට (15) සිට වී මිලදී ගැනීම ආරම්භ කරන බවයි.
කුරුණෑගල, අම්පාර, කිලිනොච්චි, මුලතිවු, වව්නියා, මඩකලපුව, ත්‍රිකුණාමලය යන ප්‍රදේශ ඒ යටතට අයත් වනවා.
සභාපතිවරයා පැවසුවේ, වී මිලදී ගැනීම සඳහා 8%ක පොලියට ගොවි භාරකාර අරමුදලෙන් මිලියන 100ක ණයක් ලබාගත් බවයි.
කෙසේ වෙතත්, වී මිලදී ගැනීම සඳහා රජයේ මුදල් ප්‍රතිපාදනයක් වෙන් කර නැහැ.
දැනට දකුණු පළාතේ වී මිලදී ගැනීම ආරම්භ කර තිබෙන අතර, මේ වන විට වී අලෙවි මණ්ඩලය මගින් වී කිලෝ ලක්ෂයක් මිලදී ගෙන තිබෙනවා.
ඒ අනුව, නාඩු කිලෝවක් රුපියල් 105ක මුදලකටත්, සම්බා කිලෝවක් 120ක මුදලකටත්, කීරි සම්බා කිලෝවක් රුපියල් 130ක මුදලකටත් වී අලෙවි මණ්ඩලය මගින් මිලදී ගනු ලබනවා.
