ගාසා තීරයට එරෙහි ඊශ්‍රායලයේ යුද්ධයට එක්සත් ජනපදය දක්වන සහයෝගයට එරෙහිව දියත් කර ඇති වර්ජන ව්‍යාපාරයට මේ වන විට මාසයක පමණ කල් ගත වී තිබෙනවා.
මෙම වර්ජන ව්‍යාපාරයේ ප්‍රතිඵලයක් ලෙස මැලේසියාවේ KFC අවන් හල් 100ට අධික ප්‍රමාණයක් තාවකාලිකව වසා දැමීමට සිදුව ඇති බව අල්ජසීරා පුවත් සේවය වාර්තා කරනවා.
ඇමරිකාවට අයත් KFC අවන් හල් ජාල‍යේ ශාඛා 800ක් පමණ මැලේසියාව තුළ පවතිනවා.
චීන මාධ්‍ය පවසන්නේ, මෙම අවන් හල්වලින් 108ක් පමණ මේ වන විට වසා දැමීමට සිදුව ඇති බවයි.
එලෙස වසා දැමීමට සිදු වූ අවන් හල් බොහෝමයක් පිහිටා ඇත්තේ මුස්ලිම් ජනයා බහුල වශයෙන් ජීවත් වන Kelantan ප්‍රාන්තයේ බවද සඳහන්.
මැලේසියාවේ KFC අවන්හල් සමූහය පවත්වාගෙන යන QSR Brands සමාගම පවසන්නේ අභියෝගකාරී ආර්ථික තත්වයන් හමුවේ අදාළ අවන් හල් වසා දැමීමට සිදුව ඇති බවයි.
මැලේසියාවේ KFC අවන් හල් ජාලය, එරට රැකියා සුරක්ෂිතතාවයට ධනාත්මක ලෙස බලපා ඇති බවත් එහි සේවකයන්ගෙන් 85% ක් පමණ මුස්ලිම් ජාතිකයන් බවත් එම සමාගම තවදුරටත් පෙන්වා දී තිබෙනවා.
