වායු දූෂණය උත්සන්න වීම හේතුවෙන් අද (04) පස්වරුවේ දිල්ලියේ පැවැත්වීමට නියමිතව තිබූ ශ්‍රී ලංකා කණ්ඩායමේ පුහුණු සැසිය වෛද්‍ය උපදෙස් මත අවලංගු කර තිබෙනවා.
මේ අතර, ඊයේ දිනයේ බංග්ලාදේශ කණ්ඩායමේ පුහුණු කටයුතුද වායු දූෂණය හේතුවෙන් නතර කිරීමට සිදුව තිබුණා.
ශ්‍රී ලංකාව සහ බංග්ලාදේශය අතර ලෝක කුසලාන එක් දින තරඟය එළඹෙන සඳුදා දිනයේදී පැවැත්වීමට නියමිතයි.
වායු තත්ත්ව දර්ශකය (AQI) 400 ඉක්මවීමත් සමඟ, ජාත්‍යන්තර ක්‍රිකට් කවුන්සිලයේ ප්‍රකාශකයෙකු ESPNcricinfo වෙත දන්වා ඇත්තේ මෙම තත්ත්වය සම්බන්ධයෙන් නිරන්තර අධීක්ෂණයෙන් පසුවන බවයි.
ලෝක කුසලාන තරඟය සඳහා සහභාගී වන සියලු දෙනාගේ යහපැවැත්මට ප්‍රමුඛත්වය දෙන අතර දිල්ලියේ වාතයේ ගුණාත්මකභාවය සමීපව නිරීක්ෂණය කරන බව ජාත්‍යන්තර ක්‍රිකට් කවුන්සිලය දැනුම් දී තිබෙනවා.
ක්‍රිකට් කවුන්සිලය වැඩිදුරටත් පවසා ඇත්තේ තරඟය යෙදී ඇති සඳුදා දිනයේදී එය පැවැත්වීමට සුදුසු හෝ නුසුදුසු බව තීරණය කිරීම සඳහා විශේෂඥ උපදෙස් ලබා ගැනීමටද නියමිත බවයි.
