පසුගියදා ප්‍රවෘත්ති සාකච්ඡාවක් පවත්වමින් කොවිඩ් මරණ හා කොවිඩ් රෝගයේ ව්‍යාප්තිය පිළිබදව ජනතාව දැනුවත් කළ කරාපිටිය ශික්ෂණ රෝහලේ සේවය කරන වෛද්‍ය උදාර ගුණවර්ධන මහතාව එම ප්‍රවෘත්ති සාකච්ඡාවෙන් අනතුරුව එම රෝහලේම කොවිඩ් වාට්ටුව වෙත මාරුකර යවා තිබෙනවා.
කරාපිටය ශික්ෂණ රෝහලේ අධ්‍යක්ෂ වෛද්‍ය ඩබ්ලිව්.ඒ.එම්.ෂෙල්ටන් පෙරේරා මහතාගේ අත්සනින් යුතුව වෛද්‍ය උදාර ගුණවර්ධන මහතාට ලබාදුන් ලිපියෙහි සඳහන්වන්නේ අදාළ ප්‍රවෘත්ති සාකච්ඡාවේදී කොවිඩ් රෝගීන් සම්බන්ධයෙන් මානුෂීයව කටයුතු කළ ආකාරය පැහැදිළි කර අයුරින්ම ඔහුට කොවිඩ් රෝගීන්ට සේවය කිරීම සඳහා අවස්ථාවක් ලබාදීමට මෙම මාරුවීම සිදුකරන බවයි.
ඒ අනුව සාමාන්‍යයෙන් සතියක හෝ සති දෙකකට කාලයකට පමණක් වෛද්‍යවරයෙකු සේවය කරන කොවිඩ් වාට්ටුවකට වෛද්‍ය උදාර ගුණවර්ධන මහතාව සති 4 ක කාලයකට අනුයුක්ත කර තිබෙනවා.
මේ පිළිබදව අදහස් දක්වමින් වෛද්‍ය උදාර ගුණවර්ධන මහතා පවසන්නේ කොවිඩ් මරණ වලක්වාගැනීම සදහා තමන්ට ලබාදිය හැකි උපරිම දායකත්වය ලබාදෙන බවයි.
තමන් මීට පෙරද කොවිඩ් රෝගීන්ට ප‍්‍රතිකාර කරන වාට්ටුවේ සේවය කර ඇති බැවින් එය තමන්ට අලුත් අත්දැකීමක් නොවන බවත් වෛද්‍ය උදාර සම්පත් ගුණවර්ධන වැඩිදුරටත් අවධාරණය කර සිටිනවා.
