අහුන්ගල්ල, මීද්දරමුල්ල ප්‍රදේශයේ පසුගිය 14දා සිදු වූ ඝාතනයක් සම්බන්ධයෙන් පරීක්ෂණ සඳහා යොදවන ලද පොලිස් නිල සුනඛයෙකු ඒ ආසන්නයේ පිහිටි යුද හමුදා සන්නද්ධ බුද්ධි බලකා කඳවුරට ඇතුළුවී තිබෙනවා.
අදාළ කරුණ තහවුරු කළ යුද හමුදා මාධ්‍ය ප්‍රකාශක බ්‍රිගේඩියර් රවී හේරත් මහතා පවසන්නේ පොලිස් නිල සුනඛයා එම කඳවුරට ඇතුළුවීම සත්‍ය බවත් මේ සම්බන්ධයෙන් සම්පූර්ණ පරීක්ෂණයක් සඳහා පොලිසියට අවශ්‍ය සියලු සහාය ලබාදෙන ලෙස යුද හමුදාපතිවරයා උපදෙස් ලබාදී ඇති බවත්ය.
මෙම සිද්ධියෙන් පසු එදින කඳවුරෙන් නිකුත් කළ ගිනි අවි 36ක් පොලිස් බාරයට ගැනීම පිළිබඳව විමසීමේදී ඔහු පැවසුවේ පරීක්ෂණ අවශ්‍යතා මත එම ගිනි අවි පොලිස් බාරයට ගෙන ඇති බවයි.
දරුවන් දෙදෙනෙකු ද රැගෙන යතුරුපැදියක ගමන් කරමින් සිටියදී අවුරුදු 29ක් වයසැති තරිඳු නිසංසල නැමැති පුද්ගලයාව පසුගිය 14 වනදා වෙඩි තබා ඝාතනය කර තිබුණා.
යතුරු පැදියකින් පැමිණි නාඳුනන පුද්ගලයන් දෙදෙනෙකු මෙම ඝාතනය සිදු කර ඇතැයි අහුන්ගල්ල පොලිසිය උපුටා දක්වමින් මාධ්‍ය එදින වාර්තා කළා.
ඝාතකයන් පැමිණි බවට සැකකෙරෙන යතුරු පැදියක් බුද්ධි බලකා කඳවුර ආසන්නයේ දමාගොස් තිබියදී පසුව සොයා ගැණුනා.
ඉන්පසු පොලිස් නිල සුනඛයන් යොදවා ඇති අතර, ඒ අතරින් එක් සුනඛයෙකු යතුරු පැදිය අසල සිට කෙලින්ම කඳවුරේ වැට යටින් රිංගා යුද හමුදා කඳවුර තුළට ගොස් තිබෙනවා.
ඉන්පසු එම සුනඛයා කඳවුර තුළ එක් ස්ථානයක වාඩි වී සහ ඒ අසල ඇවිදිමින් සිටි බවද පොලිස් ආරංචි මාර්ග සඳහන් කරනවා.
පසුගිය කාලයේ සිදු වූ තීරණාත්මක ඝාතන සහ අතුරුදන් කිරීම් ගණනාවක් සම්බන්ධයෙන් ද යුද හමුදා බුද්ධි අංශයට චෝදනා එල්ල වුණා.
මාධ්‍යවේදී ලසන්ත වික්‍රමතුංග ඝාතනය, මාධ්‍යවේදී ප්‍රගීත් එක්නැලිගොඩ අතුරුදන් කිරීම, මාධ්‍යවේදී නාමල් පෙරේරාට පහරදීම සහ මාධ්‍යවේදී කීත් නොයාර් පැහැරගෙන ගොස් පහරදීම ඒ අතර ප්‍රධාන වනවා.
මෙම සිදුවීම් සම්බන්ධයෙන් සැකකරුවන්ද අත්අඩංගුවට ගැනුණු අතර, බුද්ධි නිලධාරීන්ට එරෙහිව අධිකරණය ඉදිරියේ චෝදනාද ගොනුකර තිබෙනවා.
