තලේබාන් සංවිධානය ඇෆ්ගනිස්තානයේ බොහෝ ප්‍රදේශවල බලය තහවුරු කර ගනිමින් සිටින පසුබිමක සාමාන්‍ය වැසියන් දහස් ගණනින් ඔවුන්ට එරෙහිව උද්ඝෝෂණ අරඹා ඇතැයි විදෙස් මාධ්‍ය වාර්තා කර තිබේ.
තලේබාන් සංවිධානයෙන් මරණ තර්ජන එල්ල වුවද කාන්තාවන්, ළමුන් ඇතුළු දහස් ගණන් පිරිස් උද්ඝෝෂණ සදහා සම්බන්ධ වී ඇතැයි විදෙස් මාධ්‍ය වාර්තා කර ඇත.
හේරාට් ප්‍රාන්තයෙන් ඇරඹි මෙම විරෝධතා මේ වනවිට කෆිස්සා, බග්ලාන්, නුරිස්තාන්, සාරි ඊ ෆුල් ඇතුළු ප්‍රාන්ත ගණනාවක පැවැත්වී ඇතැයි සදහන් වේ.
එමෙන්ම බදාදා රාත්‍රියේ කාබුල් අගනුවර ද ඇෆ්ගනිස්තාන ආරක්ෂක හමුදාවන්ට සහය පළකරමින් දැවැන්ත විරෝධතා පෙළපාලියක් පැවති බව විදෙස් මාධ්‍ය වාර්තා කරයි.
තලේබාන් ප්‍රහාර හමුවේ සිවිල් වැසියන් පීඩාවට පත්වීම ඉහළයාමත් තලේබාන් සංවිධානය විසින් අල්ලාගත් ප්‍රදේශවල සිවිල් වැසියන්ට එරෙහිව සිදුවන ක්‍රියා පිළිබද වාර්තාවීමත් සමග මෙම උද්ඝෝෂණවලට වැඩි ජන සහභාගිත්වයක් ලැබීමට පටන් ගෙන ඇතැයි ද එම මාධ්‍ය වාර්තාවල දැක්වේ.
