ඌරු මස් සහිත ව්‍යංජනයක් ආහාරයට ගත් මැගසින් බන්ධනාගාරයේ රැඳවියන් දෙනෙක් මියගොස් තිබෙනවා.
එමෙන්ම එම ආහාර ගැනීමෙන් අනතුරුව අසාධ්‍ය තත්ත්වයේ පසුවන තවත් රැඳවියෙකු මේ වන විටත් කොළඹ ජාතික රෝහලේ ප්‍රතිකාර ලබමින් සිටින බව රෝහල් ආරංචි මාර්ග පවසනවා.
බොරැල්ල හා දෙහිවල යන ප්‍රදේශවල පදිංචිව සිටි මිය ගිය පුද්ගලයින් දෙදෙනා අයිස් මත්ද්‍රව්‍ය ජාවාරම් කිරීම සම්බන්ධයෙන් සැකපිට අත්අඩංගුවට ගෙන මැගසින් බන්ධනාගාරයේ රඳවා තිබුණා.
පසුගියදා (06) මෙම එක් රැඳවියෙකුගේ නිවසේ සකස් කළ ඌරුමස් සහිත බත් පාර්සලයක් ඥාතීන් විසින් රැගෙනවිත් ඇති ඇතර එම බත් පාර්සලය රැඳවියන් 15 දෙනෙකු පමණ ආහාරයට ගෙන තිබෙනවා.
එහිදි ඇතිවු ආසාත්මිකතාවක් හේතුවෙන් රැඳවියන් තිදෙනෙකු කොළඹ ජාතික රෝහලට ඇතුළත් කර කර තිබුණා.
මෙහිදී රැඳවියන් දෙදෙනෙකු ජීවිතක්ෂයට පත්ව ඇති අතර බරපතළ තත්ත්වයේ පසුවන තවත් රැඳවියෙකු මේ වන විටත් කොළඹ ජාතික රෝහලේ ප්‍රතිකාර ලබමින් සිටිනවා.
මියගිය පුද්ගලයින් දෙදෙනාගේ හදිසි මරණ පරීක්ෂණ කටයුතු ඊයේ (07) දිනයේ දී සිදුකර ඇති අතර එහිදි අධිකරණ වෛද්‍ය නිලධාරීවරයා විසින් විවෘත තීන්දුවක් ලබාදී තිබෙනවා.
ඒ අනුව, ඔවුන් දෙදෙනාගේ ශරීර කොටස් වැඩිදුර පරීක්ෂණ සඳහා කොළඹ වෛද්‍ය පර්යේෂණ ආයතනය වෙත යොමුකරන ලෙස දැනුම් දී තිබුණා.
කෙසේවෙතත්, මෙම සිද්ධිය සම්බන්ධයෙන් බන්ධනාගාර දෙපාර්තමේන්තු මට්ටමින් ද පරීක්ෂණයක් පැවැත්වෙන බව බන්ධනාගාර දෙපාර්තමේන්තුව පවසනවා.
