“X” සමාජ මාධ්‍ය ගිණුම් හිමියන්ගෙන් මාසිකව මුදලක් අය කර ගැනීමට අපේක්ෂා කරන බව ඊලොන් මස්ක් පවසනවා.
ඊශ්‍රායෙල් අග්‍රාමාත්‍ය බෙන්ජමින් නෙතන්යාහු සමග පැවති සාකච්ඡාවකදී ඔහු මේ බව ප්‍රකාශ කර තිබෙනවා.
ටෙස්ලා සහ SpaceX හි ප්‍රධානියා වන මස්ක් පවසන්නේ මෙම සමාජ මාධ්‍ය ජාලය භාවිත කරන්නන්ට මාසිකව යම් මුදලක් ගෙවීමට සිදුවුවහොත් ව්‍යාජ ගිණුම් පවත්වා ගෙන යන්නන් ඉන් ක්‍රමානුකූලව ඉවත්විය හැකි බවයි.
මේ වන විට X ගිණුම් හිමියන්ගෙන් කිසිදු මුදලක් අයනොකෙරෙන නමුත් එහි පරිශීලකයින්ට මුදල් ගෙවා X Premium හා සම්බන්ධ විය හැකි පහසුකම සලසා දී තිබෙනවා.
X සමාජ මාධ්‍ය ජාලයෙහි මාසික පරිශීලකයින් මිලියන 550 ක් දිනකට සටහන් මිලියන 200 ක් පළ කරන බවද මස්ක් මෙහිදී පෙන්වා දී තිබෙනවා.
ලොව ධනවත්ම පුද්ගලයා ලෙස සැලකෙන මස්ක් ට්විටර් ජාලය මිලදී ගැනීමෙන් අනතුරුව එය X ලෙස වෙනස් කිරීමට පසුගිය ජූලි මස පියවර ගෙන තිබුණා.
2022 ඔක්තෝම්බර් මාසයේදී මස්ක් ට්විටර් සමාජ මාධ්‍ය වෙබ් අඩවිය මිලදී ගැනීමට පෙර මිලියන 238 ක් වූ දෛනික ක්‍රියාකාරී පරිශීලකයින් පිරිසක් එහි සිටි අතර එහිදී එම සමාජ මාධ්‍ය වෙබ් අඩවියේ පරිශීලකයන්ගේ ප්‍රමාණය වෙනස් ක්‍රමයකින් ගණනය කර තිබුණා.
