බස්නාහිර පලාතේ කොවිඩ් 19 වෛරසය සීග්‍රයෙන් පැතීරීම නිසා වහාම ක්‍රියාත්මක වන පරිදි බස්නාහිර පළාතේ සිටින පුද්ගලයින්ට වෙනත් පළාත්වලට ගමන් කිරීම තහනම් කිරීමට රජය පියවර ගෙන ඇත.
ඒ අනුව අද මධ්‍යම රාත්‍රියේ සිට නොවැම්බර් 15 වන දින මධ්‍යම රාත්‍රී 12.00 දක්වා මෙම තහනම ක්‍රියාත්මක බව යුද හමුදාපති ශවේන්ද්‍ර සිල්වා මාධ්‍යට පවසා තිබුණි.
කොවිඩ් 19 වෛරසය පැතීරීමේ දැඩි අවධානමක් ඇති අධි අවදානම් කලාප ලෙස නම් කර ඇති ප්‍රදේශවලින් ඉවතට පැමිණීමට හෝ ඊට ඇතුළුවීමට කිසිවෙකුට ඉඩ නොතබන්නැයි ජනාධිපතිවරයා නිලධාරීන්ට උපදෙස් ලබා දී ඇති අතර කොවිඩ් ආසාදිතයන් වැඩි සංඛ්‍යාවක් හඳුනාගෙන ඇති බස්නාහිර පළාතේ සිට සෙසු පළාත්වලට සිදුකරන සංචරණය වැළැක්වීමට පියවර ගන්නා ලෙස ද ජනාධිපතිවරයා පවසා ඇත.
කොවිඩ් කාර්ය සාධක බලකායේ නිලධාරීන් අද (11) පෙරවරුවේ ජනාධිපති කාර්යාලයේ දී රැස් වූ අවස්ථාවේ දී ජනාධිපතිවරයා මේ බව සඳහන් කර ඇත.
