ඉතාමත් අවම ආදායම් බදු ගෙවන ව්‍යාපාරිකයන් පිරිසක් සම්බන්ධව ශ්‍රී ලංකා පොදුජන පෙරමුණේ මන්ත්‍රී මහින්දානන්ද අලුත්ගමගේ ඊයේ (31) දින පාර්ලිමේන්තුවේ දී හෙළිකර සිටියා.
කන්න දෙකකට රුපියල් බිලියන 100ක (කෝටි 10,000/ලක්ෂ 1,000,000) ශුද්ධ ලාභයක් ලබන මෙරට ප්‍රධාන පෙළේ වී මෝල් හිමියකු වසරකට බදු ගෙවන්නේ රුපියල් ලක්ෂ නවයක් පමණක් බවත් එම වී මෝල් හිමියා එක කන්නයකට බිලියන 50 ක ශුද්ධ ලාභයක් ලබා තිබෙන බවත් මන්ත්‍රීවරයා පෙන්වා දෙනවා.
ඔහු කන්නයකට වී මෙට්‍රික් ටොන් ලක්ෂ 5 ක් මිලදී ගෙන තිබෙන අතර රුපියල් අනූවට මිලදී ගත් වී රුපියල් 220 ට විකුණා ඇති බවත් එක කිලෝවකින් රුපියල් 70 ක ලාභයක් ලබා තිබෙන බවත් මහින්දානන්ද අලුත්ගමගේ සඳහන් කරනවා.
එමෙන්ම, රේස් බුකි හිමියෙකුට අයත් ලිපිගොනුවක් ද තමා ගෙන්වා ගත් බවත් බිලියන 10 ක් ගෙවන්නැයි ඔහුට ආදායම් බදු දෙපාර්තමේන්තුව ලිපියක් යොමු කර ඇති නමුත් ඔහු එය ගෙවන්නට නොහැකි බවට ලිපියක් ආදායම් බදු දෙපාර්තමේන්තුවට පිළිතුරු ලිපියක් යවා තිබෙන බවත් වසරකට පසු පරීක්ෂණයක් පවත්වා ඔහුගෙන් ලක්ෂ 10 ක් අය කරගෙන ඔහුගේ බදු ගොනුව වසා දමා තිබෙන බවත් මහින්දානන්ද අලුත්ගමගේ හෙළිකර සිටියා.
තවද, එක් මත්පැන් බලපත්‍ර ලාභියෙකු මසකට ලක්ෂ පහළොවක විස්සක ශුද්ධ ලාභයක් ලබන නමුත් වසරකට බදු ලෙස ගෙවන්නේ ලක්ෂ දෙකක් හෝ තුනක් පමණක් බවත් ඉන්ධන පිරවුම්හල් හිමියෙක් වසරකට බදු ගෙවන්නේ පනස් දහසක් හෝ හැට අටදහසක් පමණක් බවත් මන්ත්‍රීවරයා පවසනවා.
රටේ තිබෙන ආදායම් ටික හරියට කළමනාකරණය කර ගැනීමට හැකි වුවහොත් අයි.එම්.එෆ් මුදල් ලබා ගැනීමට අවශ්‍ය නොවන බවත් මෙවැනි දේ සිදු වෙද්දී ආදායම් බදු දෙපාර්තමේන්තුව ඉන්නේ කොහිදැයි ප්‍රශන කළ යුතු බවත් අතුරු අයවැය පිළිබඳ විවාදයට එක්වෙමින් මහින්දානන්ද අලුත්ගමගේ සඳහන් කර සිටියා.
